Поддршката од пратениците за Законот за амнестија единствен спас за осудените граѓани за лажни изјави по тужби од Фондот за здравство
Од независните пратеници во македонското Собрание зависи дали ќе се прифати и разгледа предлог Законот за амнестија што го подготви и поднесе Движењето за социјална правда „Ленка“. Сега се очекува барем еден од пратениците да покаже доблест и да го предложи на разгледување. На активистите на ова движење воопшто не им смета редлагачи да бидат и пратеници од власта но, искрено не веруваат дека тоа ќе се случи. Тие со овој закон ќе ја поправаат штетата што им е нанесена на десетици илјади граѓани кои добија условни затворски казни оти за 2012 година, наводно дале лажни изјави во Фондот за здравствено осигурување, за да се стекнат со бесплатно здравство.
„Движењето за социјална правда Ленка го воочи проблемот кој што се случи после лавина кривични пријави од страна на Фондот за здравствено осигурување против невработените лица кои што наводно дале лажни изјави. Тие се проследени до Основните Јавни Обвинителства, од кај нив до Судовите и веќе има изречено илјадници пресуди со условни затворски казни. Меѓутоа сите овие органи затаиле затоа што не го зеле во предвид фактот дека одлуката, т.е. одредбата врз основа на која се осудени овие лица, е веќе еднаш укината од страна на Уставниот суд и тоа по наша иницијатива. Сега ние тоа го алармираме и единствен начин да се поправи штетата е луѓето да се амнестираат, “ рече активист на ДСП „Ленка“ и доктор на правни науки ,Димитар Апасиев.
Ова граѓанско здружение се одлучи на ваков чекор затоа што смета дека најголем дел од осудените граѓани се правно неуки и не знаат какви права имаат. Донесените пресуди се правосилни и извршни па сега единствен начин за да се спасат овие граѓани е да се амнестираат.
„ Тие сега се третираат како криминалци, им се отворени судски кривични досиеја и најлошо е тоа што ова е само за 2012 година, за изјавите кои тогаш ги дале а допрва ќе следат изјави за 2013 и 2014 година. Тоа значи дека ако веќе еднаш сте осудени , вториот пат наместо условна ќе ви дадат вистинска затворска казна и вие ќе треба да одлежите затвор . Тоа е мошне сериозен проблем и цениме дека ова е најбезболниот начин да се надмине оваа ситуација. Ние се крстиме баш на овие тројца независни пратеници бидејќи опозицијата е надвор од Собранието, меѓутоа не се ограничуваме, било кој од пратениците го има тоа право,“ рече д-р Апасиев.
Доколку оваа иницијатива не им успее од „Ленка“ се подготвени да поднесат кривични пријави против Фондот за здравствено осигурување за лажно пријавување на кривично дело. Тие сметаат дека сите три државни институции Фондот, Јавното обвинителство и Судот, потфрлиле во овој случај.
„Десетици илјади граѓани, на ниво на држава, се осудени што е енормно голем број. И токму поради тоа што законот врз основа на кој што се осудени е менуван дури девет пати. Ни самите службеници не го знаат а не па невработените лица. И згора на се, имате одлука на Уставен суд со која е укината одредбата врз основа на која се осудени граѓаните. Таа изјава веќе не постои во правниот промет и не смее да постои затоа што е противуставна. Ова е багателен криминалитет. За мизерни 100 денари имате пријави и осудени лица. Ако овој процес на пресуди продолжи и во иднина ќе ни требаат околу три, четири нови затвори за да ги сместиме овие невработени а осудени лица. Пропустите се настанати кај сите три институции. Прво, Фондот за здравствено осигурување не смеел да поднесе кривични пријави. Второ Основното Јавно Обвинителство морало да провери дека таа одредба не постои во правниот промет и трето, таа работа е на Судот што значи сите три органи потфрлиле и сега нивната грешка ја плаќаат граѓаните. Единствен начин да се промени пресудена работа е преку Закон за амнестија. Нема друг начин на кој што ваков масовен проблем би можел да се реши толку брзо,“ рече д-р Апасиев.
Според него се друго е индивидуална борба во која се пропуштаат рокови за жалби или граѓаните се откажуваат од постапката поради високите судски трошоци што достигнуваат и до 50 евра или три илјади денари, паушал. Затоа тие се откажуваат за да не плаќаат дополнително пари што е само потврда дека македонското судство е едно од најскапите во Европа. Амнестијата е најбезболен начин да се тргне вината од овие граѓани без да се влечкаат по судските лавиринти и да бидат регистрирани како криминалци, сметаат од „Ленка“. /У.Ј и Д.С
