Велешани повторно хумани, голем број на крводарители на првата акција

20.01.2021

Шеесет и пет крводарители се одзваа на првата крводарителска акција годинава на Општинската организација на Црвен Крст во Велес. Од нив 16 се жени, останатите мажи како и четворица велешани за прв пат даруваа крв.

-Го видов црвеното комбе и сватив дека овде се дарува крв. Влегов и еве дарувам. Мислам дека направив добро дело, рече крводарител од Велес.

-Втор пат дарувам крв и очекувам да спасам човечки живот, рече крводарител од Велес.

Крводарителската акција траеше шест часа и се реализи во Ликовен салон во Велес. И во услови на зима и пандемија на ковид-19 има одлични резултати рече секретарот на велешкиот Црвен Крст, Орце Николов.

-Можам да кажам дека го постигнуваме успехот што го остваривме и во минатата година.

Со постигнатите крводарувања во минатата година, со кои велешкиот Црвен Крст за 182 отсто го надфрли Годишниот план ,е рангиран на второ место во државата. И тоа со 18 реализирани крводарителски акции во кои 3390 крвни единици даруваа граѓани на Велес и соседните општини Чашка, Градско и Лозово. Пет од акциите беа вонредни поради потребите од крвна плазма за време на ковид-19 во државата.

-Годинава се планирани поголем број, односно 27 крводарителски акции колку што впрочем имавме планирано и во Годишниот план за минатата година, додаде Николов.

Сепак вкупниот број на крводарителски акции што годинава ќе се реализираат ќе зависи од состојбите во државата предизвикани од пандемијата на коронавирусот.

Убавка Јаневска