Милевски од Велес: Ако има доверба во партнерите нема потреба власта да биде нервозна

23.02.2021

Одлуката на ЛДП за самостојно дејствување на двајцата пратеници, надвор од пратеничката група на СДСМ, е донесена лани, во месец август. За неа знаел коалициониот партнер СДСМ и за истата неколку пати досега било одложено јавното соопштување поради актуелни политички случувања во државата како излегувањето на пратениците на БЕСА како независни и друго. Откако била пробиена од страна на опозициски портал врвот на ЛДП одлучил неа јавно да ја соопшти. Тоа што се совпаднала со бегството на Сашо Мијалков било случајност, одговори денеска претседателот на ЛДП Горан Милевски на новинарското прашање за осамостојувањето на дваjцата пратеници на оваа партија од пратеничката група на СДСМ и вчерашната реакција на премиерот Зоран Заев.

-Изјавата на Премиерот еве можам да кажам дека е дадена можеби во нервоза по случувањето од вчерашниот ден и не гледам причина нашите односи да се нарушат. Меѓутоа секој има право на свое толкување. Ние како Либерално демократска партија не прифаќаме други политички партии да ни диктираат какви одлуки ќе донесеме и кога ќе ги донесеме. Ако има доверба во партнерскиот однос тогаш нема потреба да се плашат од најавите на опозицијата. ЛДП да сакаше да ја руши оваа Влада немаше да и даде поддршка. Ние и понатаму заеднички ќе продолжиме да работиме во Собрание но ќе ги користиме алатките што ги овозможува Деловникот за работа. Сега кога ќе дојдат интерпелациите на двајцата министри ќе бидеме против смената, рече Милевски.

Првиот либерал демократ дообјасни дека партиските одлуки ги носат колективно, во демократски услови и вообичаено било правилото пратениците целосно стојат зад нив. На новинарското прашање има ли партискиот врв контрола над двајцата пратеници по континуираните изјави на опозициски високи структури за најави дека два или три пратеници ќе преминат од таборот на власта во опозицијата тој одговори:

-Јас и незнам зошто се крева толкава фама по изјавите на опозицијата. Ним од денот на формирањето на владата им фалат два до три пратеници за да го состават мнозинството. Ако го имаа тие ќе составеа Влада. Нормално е ако се распадне коалиција да се оди на предвремени избори или да се формира техничка Влада. Јас разгледувајќи ги и познавајќи ги пратениците не верувам дека некој од нашите коалициони партнери би превзел потег за туркање на владата, додаде Милевски.

Иако смета дека никогаш не може точно да се знае, сепак Милевски, лично мисли дека до локалните избори тоа не би се случило. Изјавите на опозицијата ги коментира пред се во контекст на подгревање на опозициското расположение во опозициската партија што според него не е не демократски чин. Милевски заврши со констатација дека ЛДП не се плаши од локалните избори.

Убавка Јаневска