(ОБНОВЕНО) Запалено возилото на екс претседателот на велешки суд

СВР Велес ја потврди информацијата дека ноќеска бил запален автомобил марка Форд фиеста, но не бил во сопственост на поранешниот претседател на велешкиот суд Јордан Лазаров, туку на неговиот син. Инцидентот се случил околу три часот и четириесет и пет минути, по полноќ, кога непознати сторители го запалиле автомобилот кој бил паркиран на улицата Славко Ѓорѓиев Сватот, пред влезот на семејната куќа на Лазарови.

Синот прв го забележал пожарот и веднаш реагирал. На помош му притрчале и соседите и успеале да го изгаснат пожарот.

Неговиот татко вели дека не може да претпостави кој би можел да стори вакво нешто, но се плаши за безбедноста на своето семејство.

„Некаде околу 3,30 часот синот слушнал како нешто бувнало, кога видел дека автомобилот е во пламен, ме повика мене, истрчавме надвор да го гасиме пожарот. На помош дојдоа и соседите, а ја повикавме и полицијата и противпожарната. Најдоа бензин и ракавици. Ова не е убаво бидејќи можело да се случи поголема несреќа, затоа што автомобилот е на плин, рече Јордан Лазаров.

По барање на јавен обвинител, увид на лице место изврши увидна екипа на СВР Велес. Се уште се трага по сторителите и причините за опожарување на автомобилот./Д.С

09:29 – Ноќеска, околу 3,30 часот , засега непознати сторители го потпалиле автомобилот марка Форд фиеста на поранешниот претседател на Основниот суд во Велес Јордан Лазаров. Колата била паркирана пред влезот на семејната куќа на Лазарови во новиот дел на градот.

Пожарот прв го забележил синот и веднаш реагирал. На помош дошле и соседите па по извесно време пожарот бил угаснат.

Случката била пријавена во полиција. Во моментов се врши увид на местото на запаленото возило./Д.С