Велешките акцијаши, ветерани и млади, одлични на траса и во слободни активности на МРА „Рибариќи“ во Нови Пазар

Со вкупно 11 бригадири, пет млади и шест ветерани, партиципира ЗГ„Велешки акцијаши“ во Македонската акцијашка бригада на Меѓународната работна акција „Рибариќи“ која што се одржува во градот Нови Пазар, во соседна Србија. Тие заедно со останатите македонски акцијаши од Штип ја составија бригадата која брои вкупно 31 бригадири, од кои 12 млади и 19 ветерани од кои тројца се од Србија а се членови на ова велешко акцијашко здружение. МРА„Рибариќи“ засега е единствена работна акција на територијата на нашиот северен сосед.

Трасата на Меѓународната работна акција се наоѓа на езерото „Рибариќи“,рече за Дума.мк Делчо Костов претседател на ЗГ„Велешки акцијаши“.

-Работиме на уредување на плажите на езеро „Рибариќи“. Додека младите акцијаши го рамнат делот на плажите по кипање на количините со шљунак, ветераните го градат потпорниот ѕид. Македонската работна бригада на акцијата стигна во саботата, на 20 јули и присуствуваше на свеченото отворање на меѓународната акција. Од вчера сме веќе на траса, работиме напорно и горди сме на резултатите што ги постигнуваат 12 млади македонски бригадири. Користам можност да ги информирам нивните родители дека тие се здравствено добри и освен што постигнуваат одлични резултати на траса одлично ги бранат боите на Македонија во културно забавните, спортските и интелектуалните игри во попладневните и вечерни часови на акцијата“, додаде Костов претседател на ЗГ „Велешки акцијаши“.

Годинава на Меѓународната работна акција „Рибариќи“ учествуваат четири Работни бригади, по една од Македонија, Србија, Босна и Херцеговина и Турција. На акцијата во помали групи пристигнаа и акцијаши ветерани од Словенија, Хрватска и Црна Гора. Сите акцијаши се одлично прифатени од домаќините, организаторите на Меѓународната работна акција „Рибариќи“ и граѓаните на Нови Пазар. Акцијата ќе трае до сабота, 27 јули.

Учеството на работната акција на македонската бригада е од особено значење за македонските акцијаши ветерани затоашто од една страна ја враќаат старата добра традиција на доброволна работа и од друга страна го пренесуваат искуството на млади луѓе во кое доминира давањето придонес во работа од која не се очекува финансиски бенефит туку се подигнува квалитетот на живот на граѓаните во локалната заедница.

Убавка Јаневска