(Видео и фото) Експедиција „Авантуристички туризам“ низ Македонија на Костич и Џајич – две момчиња од Краљево, Србија

Кога пешачењето и планинарењето се ваше хоби, аматерски трчате полумаратони и секако сте млади луѓе тогаш воопшто не е тешко да се впуштите во експедиција „Авантуристички туризам“. Така го опишаа сопствениот подвиг двајца млади луѓе од Краљево, во соседна Србија, кои на крајот на минатиот месец тргнаа пеш од родниот град, поминаа низ предели кои се дел од сопствената држава, ја испешачија Македонија и за десетина дена стигнаа на Кајмакчалан, во Грција.

Богдан Костич и Џорџе Џајич, со цела опрема на себе, ги сретнавме во Велес. Скоро на половина пат од нивната поставена цел да испешачат 600 км и притоа да посетат македонски градови, села, бањи, цркви, манастири, планини и реки како и да запознаат менталитет и култура на различни граѓани во повеќе локални заедници за кои претходно читале, собирале податоци или контактирале со десеттина луѓе. Меѓу нив се и неколкумина Македонци.

Во разговорот што го водевме со Богдан и Џорџе, додека кратко одмараа со нивниот велешки домаќин Зоран Игнов, тие ни зборуваа за еден поинаков начин на користење на летен одмор поточно за водење на здрав живот од страна на млади луѓе.

„Да се доживее секој миг на природата, запознаат различни вредности,традиции и култури, контактираат луѓе од различни етнички заедници или вероисповед, посетат бројни места се сосема поинакви нешта од чувствата и впечатоците кои се стекнуваат на интернет. Од Краљево до Велес запознавме над 100 луѓе, со 30 се задржавме над 10 минути во разговори за нивниот и нашите животи. Мислам дека тоа е многу значајно на наши години бидејќи така стекнуваме животно искуство, рече Џорџе.

Тој веќе ги имаше собрано впечатоците од половина пат во кои еден е дека „во јазикот и дијалектите на кои зборуваат луѓето на југ од Краљево има се помалку падежи“.

„Свативме дека разбираме Македонски јазик. Само додека зборуваат нашите соговорници во Македонија да не говорат брзо. Ако зборуваат брзо, „фаќаме“ по некој збор, па препрашуваме и се разбираме. Влеговме на граничен премин Прешево, преноќивме во Куманово, па потоа во Катлановска бања, следна е Чашка, каде ќе ноќеваме кај дедо Тодор кого го запознавме преку Стефко, нашиот пријател во Скопје, потоа во манастирот „Свети Ѓоргија“ кај Прилеп, па во Битола и преку граничен премин „Меџитлија“ ќе влеземе во Грција. Ќе преспиеме во еден град под планината за потоа да се искачиме на Кајмакчалан,“ додаде Богдан.

Во ова животно искуство на овие млади луѓе, трајно врежани ќе останат впечатоците од првичните средби со новите пријатели, дел сосема случајни, од Србија и од Македонија, како и нивната помош  во сместување или логистика, со многу значајни информации.

Да имаа повеќе време за разговор веројатно ќе можевме да ги забележиме и впечатоците кои ги импресионираа Џорџе и Богдан во Македонија. Првично ни рекоа дека се воодушевени од гостопримливоста на македонците, импресионирани од местото на некогашниот споменикот од Прва светска војна „Зебрење“ кај Куманово, од различните култури, традиции и обичаи на кумановци кои живеат во мултиетничка заедница, од срдечниот пречек на врањанци, од срдечноста на граѓаните во Катлановска бања, во Велес итн.

Како што се договоривме, Богдан и Џорџе ни испратија фотографија од целта на нивната експедиција поточно од Кајмакчалан. Тие се вратија во родното Краљево кое на некој начин ја помогна нивната авантуристичка експедиција за што се особено благодарни на фирмата „Радијатор инжињеринг“, како и на логистичката помош на градските Цивилна заштита и Доброволно противпожарно друштво.

До некој нареден подвиг на овие две момчиња кои не заборавија да го спомнат македонскиот бисер, Охрид, Дума.мк нивната авантуристичка приказна ја објавува во пресрет на 12 Август – Меѓународниот ден на младите.  

Убавка Јаневска