Бислимоски: Нема промени на цената на електрична енергија
02.02.2021
И покрај зголемувањето кај соседите, нема да има промени на цената на електричната енергија кај нас. Ниедна од енергетските компании нема доставено барање до Регулаторната комисија за енергетика и водни услуги дека ги зголемиле трошоците, потврди за МИА претседателот на Регулаторна комисија за енергетика и водни услуги, Марко Бислимоски.
-Гледаме дека во Србија цената се зголеми за 7,9 отсто што значи дека генерално и регионалните енергетски компании се соочуваат со тешка година на намалени приходи, а зголемени расходи, изјави Бислимоски.
Фокусот на Регулаторна комисија за енергетика и водни услуги, , е насочена кон проширување на опсегот на листата на ранливи потрошувачи да добијат финансиска помош за подмирување на сметките токму на оние на кои им е најпотребно.
Во моментов се врши дефинирање на категориите на кои ќе им бидат намалени сметките за електрична енергија. Една од таргетираните категории се семејства каде има еден пензионер со минимална пензија (прва група) и истата е единствен приход, појасни Бислимоски.
Од 1 февруари цената на електричната енергија во Србија е повисока за 7,9 отсто иако беше најавено дека цената на струјата ќе се покачи за 3,4 отсто. Потоа стигна владина уредба со која потрошувачите од 1 јануари годинава имаат повисоки сметки заради зголемувањето на поддршката за повластените производители на електрична енергија. Овој надомест е зголемен за речиси четири пати од досегашните 0,093 динари на 0,437 динари по киловат потрошена електрична енергија со што покачувањето на цената достигна до 7,9 проценти.
