РСБСП: Најчесто во сообраќајни незгоди страдаат пешаците, се апелира до сите возачи и пешаци да ги почитуваат сообраќајните правила и прописи

11.02.2021

Од 25 до 30 отсто од вкупниот број на загинати лица во сообраќајни незгоди се пешаци, а статистиката покажува дека повозрасните пешаци и понатаму остануваат една од најранливите и најзагрозените групи учесници во сообраќајот.

Пешаците се најмасовна и најранлива група учесници во сообраќајот, а истовремено и најмалку контролирана и најмалку санкционирана.

– За жал и покрај тоа што спаѓаат во групата на ризични и ранливи групи на учесници во сообраќајот, пешаците се истовремено и најнедисциплинирани учесници во сообраќајот. Пешаците учествуваат во сообраќајот реализирајќи ги своите секојдневни активности и главниот проблем е тоа што кај пешаците недостасува чувство дека и тие се активни учесници во сообраќајот и дека и за нив важат сообраќајни правила и прописи кои мораат да ги почитуваат, информираат од Републичкиот совет за безбедност на сообраќајот на патиштата

Исто така, се додава во соопштението, може да се каже дека и возачите не ги почитуваат пешаците како рамноправни и ранливи учесници во сообраќајот, и за жал последицата од таквиот пристап е од 30 до 35 загинати пешаци во сообраќајни незгоди просечно годишно, при што повеќе од 50 отсто од загинатите пешаци се возрасни лица над 60 години.

– Лична одговорност, свест и совест, сообраќајна култура, толеранција и максимално почитување на сообраќајните правила и прописи од страна на секој учесник во сообраќајот, е единствениот начин да се намали бројот на загинати и повредени лица во сообраќајни незгоди. Во спротивно, за жал, порано или подоцна, директно или индиректно ќе ги почувствуваме последиците од неодговорното учество во сообраќајот, порачуваат од РСБСП.

За безбедно преминување на улицата, посочуваат, потребно е максимално и целосно почитување на сообраќајните правила и прописи и од страна на пешаците и од страна на возачите.

– За жал, секојдневно можеме да видиме пешаци како поминуваат улица надвор од пешачки премин, на црвен пешачки семафор, како се движат помеѓу две коловозни ленти, помеѓу возила во движење, но и пешаци кои воопшто не ги следат случувањата во сообраќајот поради мобилниот телефон или слушањето музика. Непотребно и долго задржување на коловозот е редовна појава, особено од страна на повозрасните пешаци. Ваквото однесување на пешаците во сообраќајот резултира со голем број загинати и повредени лица, порачуваат од РСБСП.

Црната статистика е последица на непочитување на сообраќајните правила и прописи, како од пешаците така и од возачите. Се апелира возачите да се движат со особено внимание секогаш кога се приближуваат кон пешачки премин, да ја намалат брзината и да ги прoпуштат пешаците на пешачкиот премин. Но тоа никако не значи дека пешаците имаат апсолутно право на првенство на минување.

– Напротив, пешакот е должен да ја помине улицата на пешачки премин откако ќе се увери дека тоа може да го направи без да го загрози безбедното одвивање на сообраќајот, односно откако ќе се увери дека возилата што се движат на коловозот се во можност безбедно и навреме да застанат. Непочитување на ова правило од страна на возачите и на пешаците е најголема причина за сообраќајни незгоди во кои страдаат пешаците,порачуваат од РСБСП.