„Меѓународен сојуз“: Јовановски доби 9 години затвор, Ременски е ослободена од обвинението

Девет години затвор изрече судијката во случајот „Меѓународен сојуз“ за првообвинетиот Бојан Јовановски, при денешното носење на пресудата.

Второбвинетата Јасна Мандиќ доби казна затвор од 4 години, во кое време и се засметува и времето поминато во притвор.

Обвинетиот Миле Јовановски, татко на првообвинетиот доби условна затворска казна од две години.

За поранешната пратеничка и член на СДСМ, Фросина Ременски е утврдено дека не е виновна по ниту една основа од обвинението.

Според обвинителниот акт, обвинетите ги измамиле бизнисмените Силјан Мицески и Адријан Амзоски дека ќе учествуваат во проект преку „Меѓународниот сојуз“ на Бојан Јовановски – Боки 13 и ги оштетиле со повеќе илјади евра.

Бојан Јовановски – Боки 13 беше обвинет за кривичните дела „измама и перење пари”. Обвинети во овој случај беа и поранешната пратеничка од редовите на СДСМ Фросина Ременски, Миле Јовановски, таткото на првообвинетиот Бојан Јовановски, и Јасна Мандиќ – Ерцеговиќ. Обвинетата Ременски се товареше за кривично дело „помагање во делото измама”, Мандиќ за „помагање во измамата и перењето пари”, а Миле Јовановски се товареше за „помагање во перењето пари” и за „неовластено изработување, држење, посредување и тргување со оружје”.