Пензионери останаа без пари по присилната наплата на долгот за радиодифузна такса
Осумдесет годишна старица, која пет години не живее во сопствената куќа и побарала од јавниот сервис да не ја задолжува со месечна претплата затоа што редовно плаќа нејзината ќерка со која живее, остана без две третини од пензијата за месец јануари бидејќи УЈП го реализирала решението за принудна наплата.
Семејството на баба Павлина лани во ноември писмено побарало старицата да биде ослободена од давачката за радио дифузна такса затоа што таа над три децении претходно не користела телевизор и била ослободена од таксата додека живеела сама во куќата.
– Во ноември, откако ја примивме опомената бевме во велешкото одделение на управата, поднесовме барање и тогаш ни рекоа дека ќе не информираат за одлуката на МРТВ. До вчера не не информираа ниту дополнително не викнаа. Штом видовме дека директно се симнати парите од трансакциската сметка на мајка ми бевме во управата и тогаш ни соопштија дека нашето барање било одбиено. Не е во ред ова што се случува. Од 6 илјади денари пензија одеднаш да запрат 4 илјади со образложение дека станува збор за наплата од 2,5 илјади и банкарска провизија од 1,5 илјади денари, рече керката на баба Павлина.
Во идентична ситуација деновиве се наоѓа и велешанката Јадранка. Таа живеела сама од наследната пензија на починатиот сопруг.
– Не ми е јасно како може да ми запрат повеќе од една третина од пензијата. Нели законски треба толкав износ. Сега незнам како ќе го преживеам месецот. Комуналии неможам да платам бидејки немам пари храна да си купам, рече таа.
Принудната наплата на радиодифузната такса создаде гужва и редици пред шалтерите на банките во Велес. Голем број на пензионери со ниски пензии реагирааt на одеднаш запрените пари. Дел од нив рекоа дека ќе се консултираат со адвокат а потоа своите права ќе ги бараат на суд./Б.Н