Добитник на наградата Почесно рациново признание, за прв пат постхумно, за хрватскиот универзитетски професор Матеевиќ
Истакнатиот универзитетски професор и шеф на катедри на три респективни универзитети, загрепскиот, париската Сорбона и римската Ла Сапиенца, Предраг Матеевиќ, е годинешен добитник на Почесното Рациново признание . Тој наградата ја заслужи за афирмацијата и промоцијата на македонскиот јазик, книжевност и култура во светот. Одлуката ја донесе двочленото жири на културната манифестација составено од професорите д-р Јелена Лужина и Људмил Спасв.
– Предраг Матвеевиќ , како визитинг професор предавал на дваесеттина европски и американски универзитети. Бил доживотен почесен подпретседатл на светскиот П.Е.Н. Добитник е на педесеттина најпрестижни европски награди и носител е на некои од највисоките одликувања како што е офицер на Легијата на честа во Франција, на највисоко италијанско државно признание. Тој објавил петнаесеттина авторски книги напишани на хрватски јазик и уште пет-шест на француски јазик. Во неговиот „Медитерански бревијар“, преведен на дваесет и четири јазици и само во Италија продаден во три стотини илјади примероци, Македонија се „провлекува“ како една од најемотивните референци. Матвеевиќ од 2009 година се до неговата смрт пред четири месеци, беше член на МАНУ, рече д-р Лужина на денешното соопштување на наградата во зградата на општина Велес.
Тој е хуманист, полиглот, идеалист кој доживотно ги застапуваше постулатите за братство, еднаквост и слобода, левичар од автентична Рациновска провениенција, граѓанин на светот, докажан пријател на Македонија.
– Предраг Матвеевиќ почина пред нецели четири месеци. Му благодариме на организацискиот тим на манифестацијата Рацинови средби што го прифати нашиот предлог и како предлог го доби Почесното рациново признание. Жалам што Предраг Матвеевиќ не може да ја прими оваа награда. Неговото семејство ме овласи да пренесам дека нему, сега каде и да се наоѓа, му е многу драго поради овој чин,“ додаде проф Лужина.
Таа додаде дека годинешниот лауреат на Почесното рациново признание, исто така, бил заслужен за спасувањето на македонскиот поет Јован Котески од затворската казна долга пет години.
Наградата ќе биде врачена на годинашните 54 Рацинови средби што во Велес ќе се одржат на 9 и 10 јуни. Културната манифестација ја организира ФАД „Стоби“ преку делегирана надлежност на општина Велес и со финансиска помош на Министерството за култура./У.Ј