Анџела Прајс Агелер новa амбасадорка на САД во Македонија

Анџела Прајс Агелер, дипломатка од кариера, е номинирана од американскиот претседател Џо Бајден да биде нова амбасадорка во Скопје, Северна Македонија, соопшти Белата куќа.

Станува збор за дипломатка од кариера која досега била в.д. амбасадорка и заменичка на амбасадорот во Исламабад, Пакистан.

Одреден период од својата кариера Агелер веќе поминала во Скопје, каде работела како службеничка за односи со јавноста во американската амбасада.

Агелер работела како советник за односи со јавноста во амбасадата на САД во Париз, Франција, а била и на дипломатски задачи во американските амбасади во Буркина Фасо, Унгарија, Виетнам, како и во конзулатот во Ченај, Индија.

Таа работела и како заменик-помошник државен секретар за печат и јавна дипломатија во Бирото за печат и јавна дипломатија, портпаролка на Бирото за конзуларни прашања при Стејт департментот итн.