Велешкиот Црвен крст донираше 180 училишни ранци на ученици од рурални средини

Волонтерите на велешки Црвен крст денеска ја реализираа една од највпечатливите хуманитарни акции во пресрет на крајот на учебната година. Во соработка со хумана сограѓанка од Велес, беа донирани вкупно 180 училишни ранци за ученици од неколку рурални училишта во околината.

Донацијата беше наменета за поддршка на учениците кои посетуваат настава во подрачните училишта „Лирија“ во село Бузалково и „Петар Поп Арсов“ во село Извор, како и во основното училиште „Тодор Јанев“ во Општина Чашка.

-Радоста кај децата и искрената благодарност од наставниците и родителите беа најголемата награда за нашиот труд. Овие моменти не потсетуваат колку е значајна секоја форма на поддршка за најмладите, особено во руралните средини, истакнаа од Црвениот крст – Велес.

Со оваа акција, општинската организација на Црвениот крст од Велес уште еднаш потврди дека хуманоста и солидарноста остануваат двигатели на позитивни промени во заедницата.

Стефани Манева