(Видео и фото) Пензионерски протест во Велес: Ќе истраеме се додека не видиме насмевка на пензионери со и под минимален износ на пензија
На многу топло и спарно време, вчеравечер, долга колона од пензионери во Велес тргна од споменикoт на Панко Брашнаров, во Нова Населба, и пеш стигна на плоштад С`рмаале за да го изразат сопственото незадоволство од неприфатените барања за линеарна исплата на 3.500,00 денари за секој пензионер во државата како и на минимална пензија во висина од 18.000,00 денари.
Пензионерите чекореа во колона предводена од колеги кои ги носеа транспарентите со испишаните барања и го вееја државното знаме. На плоштад С`рмаале пред нив се обратија Кире Василевски и Цветанка Петковска, членови на Иницијативен одбор на незадоволни пензионери на Велес како и Драган Угриновски член на Иницијативен одбор на незадоволни пензионери на Македонија.
Василевски, Угриновски и Петковска зборуваа за сиромаштијата во која живеат со пензии кои во последните години ги добивале од државата во чиј раст и развој дале личен придонес преку работа, издвојувајќи придонеси од работничката плата што сега валоризирана во пензии не им овозможува достоинствен живот. Тие додадоа дека жалат што борбата за социјална правда со државните институции мораат да ја водат на улица и потенцираа дека нема да се откажат од барањата за по хуман и по достоинствен живот на оваа категорија на граѓани во Македонија.
Доколку владата,собранието и министерството за труд и социјална политика не ги прифати нивните барања од Иницијативниот одбор на незадоволни пензионери на Велес најавија следни активности коишто најверојатно ќе се реализираат преку блокирање на улици и крстосници.
Убавка Јаневска