Отворена портретна изложба на Ѓорѓи Зографски во Народен музеј Велес

Девет портрети од последниот зограф и профан сликар Ѓорѓи Зографски, денеска беа изложени во просториите на Народен музеј во Велес. Портретите се во приватна сопственост на членовите на семејството на Зографски а дел од нив се и во сопственост на црквите. На денешната изложба присутна беше и неговата снаа Панда Зографска која отстапи три портрети од нејзината приватна колекција.

-Голема благодарност до Општина Велес, градоначалникот и Народниот музеј за укажаната почит кон Ѓорѓи Зографски и неговите дела. Тој остави дела и спомени во сите семејства кои се негови наследници, неговиот лик и неговото дело ќе продолжат да живеат во генерациите што следат, рече Зографска.

Во наредните 30 дена, сите заинтересирани граѓани може да го посетат музејот и да ја разгледаат изложбата на Зографски, поточно портретите на Димче Левков, Димитрија Аџи Манче, Димко Чокал, Михаил Чекрдаков како и на други познати личности, видни еснафи во занаетчиството и трговијата.

Изложбата насловена „Портретното сликарство на Горѓи Зографски“ беше реализирана по повод 78 години од смртта на зографот. Настанот беше збогатен со изведба на виолинистиката Камелија Дукова Зефиќ.

Стефани Манева