Ковид не е ни игра, ни план за депопулација

Не е вистина дека ковид е план за депопулација, туку во прашање е пандемија предизвикана од коронавирусот со којашто се соочи целиот свет.  Пандемијата, иако насекде во светот одзема бројни животи од различни возрасни групи, сепак не успеа да ја намали светската популација, која од година во година расте. Во 2021 година, една година откако почна пандемијата со коронавирусот, според Ворлдометерс светската популација е повисока од онаа во 2019 година. Во 2021 година во светот има 7.9 милијарди луѓе, наспроти 7,7 милијарди во 2019 година 

Рецензираме пост на Фејсбук во кој се тврди дека ковид е план за депопулација. Ваквата теорија на заговор е една од најактуелните уште од почетокот на пандемијата, а продолжува и во текот на вакциналната кампања, со цел да се дезинформираат граѓаните и да не се вакцинираат. Зад целата приказна за наводната депопулација стои наративот дека затскриени сили и елити, преку ковид-19 се обидуваат да го намалат бројот на светското население.

Game over. Ковид план за депопулација, пишува во постот што го рецензираме.

Меѓутоа, ковид-19 е болест предизвикана од коронавирусот, а не план за депопулација. Вирусот беше идентификуван од кинеските власти на 7 јануари 2020 година, по што неговиот генетски материјал РНК, беше изолиран. Самата Светска здравствена организација потврдува  дека вирусот е изолиран на 7 јануари 2020 година и во следното известување.

Обединетите нации во публикација од 2019 година  навеедуваат дека светската популација продолжува да расте со успорена стапка.

Светската популација продолжува да расте иако со помала стапка отколку во 1950 поради намалените нивоа на плодност. Во 2019 година имало 7.7 милијарди луѓе во светот а до 2030 се проценува дека ќе порасне бројот на 8.5 милијарди, до 2050 ќе порасне на 9.7 милијарди и 10.9 милијарди до 2100 година, се вели во извештајот на страница број 1.

Во 2021 година, пак, откако почна и уште трае пандемијата со коронавирусот, според Ворлдометерс светската популација е повисока од онаа во 2019 година. Во 2021 година во светот има 7.9 милијарди луѓе, наспроти 7,7 милијарди во 2019. Оттука, произлегува дека наводниот план за депопулација со ковид, дури и кога би постоел, не дава резултати. Настрана фактот што нема таков план. Светот е соочен со голема криза поради неочекуваната појава на вирусот којшто економски, социјално, здравствено и емоционално ги погоди граѓаните и државите и економиите во светот!

Зошто се случуваат пандемии?

Според глобалната алијанса за вакцинација ГАВИ, и покрај напредните техники во медицината и науката, потенцијалот денеска болест да се рашири е, всушност, повисок, а со тоа и ризикот болеста да ескалира од епидемија во пандемија. Масовната глобализација и поврзаност, занчи дека и болестите може да патуваат од еден до друг крај на светот. Според ГАВИ, има поголем ризик од пандемии зашто луѓето патуваат повеќе отколку во минатото, исто така, поради глобализацијата, климатските промени, повеќе контакти меѓу луѓето и животните отколку во минатото и поради тоа што има намален број на здравствени работници. Повеќе на оваа тема може да се прочита овде. 

Во светот досега од ковид-19 починале 5.61 милиони луѓе. Меѓутоа, со вакцинацијата се спречува овој број да биде уште поголем, бидејќи се намалува стапката на смртен исход, споредено кога не би постола вакцина. Доколку некој би сакал да изврши масовна депопулација на населението, тогаш воопшто не би се правеле глобални напори да се создадат вакцини, камоли за толку кратко време и да бидат масовно дистрибуирани насекаде во светот во досега невиден напор да се стопираат смртните исходи од пандемијата. Според Ен Би Си Њуз, вакцините спречија досега четвртина милиони смртни случаи само пролетта минатата година. Европскиот центар за превенција и контрола на болести извести дека за помалку од година, со вакцинацијата се спасени речиси половина милиони животи.

Сите овие факти одат во прилог на тоа дека смртниот исход од болеста ковид-19 која е непредвидлива и досега се покажа дека ги афектира луѓето на различни начини, особено повозрасните и оние со коморбидитети, но имаше и погодени млади и без никакви придружни болести, се намалува со вакцинацијата. Односно, здравствените институции, релевантните медицински тела, Светската здравствена организација, националните влади со консензус работат во прилог на тоа да овозможат на граѓаните да им бидат достапни вакцини, со цел да се спасат нивните животи и да се зачува јавното здравје. Овие обиди не сугерираат на план за депопулација, туку на план за вакцинација и заштита на животот на луѓето односно намалување на последиците од пандемијата која го погоди целиот свет без исклучок. Неверојатни и недокажани се тврдењата дека постојат светски елити, влади во сенка, кои што се обидуваат преку ковид да ја намалат бројката на живи луѓе на планетата. Тоа не е можно.

Исто така, животниот век на луѓето е продолжен. Обединетите нации проценуваат дека глобалниот просечен животен век е 72,6 години. За споредба, во сиромашниот предмодерен свет животниот век бил 30 години. Тогаш немало ни вакцини, ни медицина.

Поради сите горенаведени факти оценуваме дека не е вистина дека ковид е план за депопулација, туку во прашање е пандемија предизвикана од коронавирусот и со којашто се соочи целиот свет.  Пандемијата, иако насекаде во светот одзема бројни животи од различни возрасни групи, сепак, не успеа да ја намали светската популација, која од година во година расте.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар