Произволни апокалиптични тврдења за вакцината против ковид-19

Апокалиптичното видео во кое се тврди дека за најдоцна неколку години сите што примиле вакцина против ковид ќе починат, е неодговорно и таквото тврдење не го дава доктор по медицина.  Ваквите наводи се произволно нафрлени, без никакви  докази и немаат допирна точка со реалноста. Вакцините се следат за несакани ефекти и тоа преку пријава во секоја земја, која потоа се процесира на глобално ниво. Целта на овие пријави е да се пронајдат нови несакани ефекти (евентуално) кои не се наведени во упатството за користење

Рецензираме пост на Фејсбук, во кој се тврди дека извесен доктор Шон Брукс, кој, според наведеното, е ,,специјалист за интерна медицина, со над 23 години искуство,“ како и дека „испраќа страшно предупредување за експерименталната вакцина против ковид”. „Уште колку специјалисти ќе бидат игнорирани“, прашува авторот на постот и додава, атрубуирајќи го своето тврдење на Брукс, дека:Вакцинираните ќе умрат од 6 месеци до 3-5 години, сите се стерилизирани и не можат да имаат деца.

Сите овие тврдења се дезинформации.

На 5 февруари, Американскиот колеџ за гинекологија и Американското здружение за репродуктивна медицина издадоа соопштение, со кое ги уверуваат пациентите дека нема докази оти ковид вакцината може да повлијае врз можноста да се зачнат деца, односно дека нема докази оти вакцината предизвикува неплодност.

Доктор Ив Феинберг, медицински директор на репродуктивен центар и поранешен претседател на здружение за репродуктивна ендокринологија и неплодност, вели дека има две прашања за тоа како вакцините се поврзани со неплодноста. А тоа се: што знаеме за вакцините и плодноста и што знаеме за ковид-19 и бременоста?

Мислам дека она за кое имаме многу повеќе информации е негативниот импакт на ковид-19 и бременоста, и на мајката и на бебето, отколку што имаме информации за вакцината и плодноста. Механизмот на вакцината навистина не остава биолошка можност за таа негативно да влијае врз плодноста, изјавил Феинберг. 

Но, кој е всушност Шон Брукс и дали е на вистина специјалист за интерна медицина и доктор?

Прво, не е јасно на каков универзитет тој докторирал. Брукс вели дека има 48 публикации и 23 книги и дека учел медицина, анатомија и физиологија 21 година. Наспроти овие тврдења, на Интернет има многу малку информации за Шон Брукс и нема докази дека работи во полето на медицината како доктор.

Некои извори тврдат дека Шон Брукс нема докторат во медицината, туку дека работи во образование и не е медицински доктор. Титулата „доктор“ не мора да значи дека е на полето на медицината, може да е во право, литература или музика на пример.

И на Амазон има Шон Брукс, кој објавил книги од полето на образованието, но не од медицината. На 38 минута од ова видео, може да се види Брукс, како зборува за образованието во подкаст.

Истиот тој човек, во видеото кое го рецензираме, го споменува Роберт Валас Малон, американски вирусолог и имунолог, кој е критикуван во текот на пандемијата за ширење на ковид дезинформации. Наспроти тоа што го тврди Шон Брукс, дека Роберт Малон ја измислил вакцината мРНК и дека сега апелира да не се користи, таквите информации се неточни.

Роберт Малон работел на полето на платформи за вакцинална технологија, но не ја измислил мРНК вакцината. Вакцината е нашироко атрибуирана како достигнување на медицинските професионалци Каталин Карико и Дерик Роси.

Точно е дека Малон работел во доцните 80 ти години на Шалк институтот за биолошки студии. Но, како што вели Реин Вербек од Гент Универзитетот во Белгија:

Иако Малон за првпат ја разгорел надежта дека мРНК вакцината може да има потенцијал, денешните достигнувања со мРНК вакцината се достигнување на колаборативни напори.

Апокалиптичното видео во кое се тврди дека за најдоцна неколку години сите што примиле вакцина против ковид ќе починат, е неодговорно и таквото нешто доктор по медицина не би кажал. Тоа е произволно и нема допирна точка со реалноста, Вакцините се следат за несакани ефекти и тоа преку пријава во секоја земја, која потоа се процесира на глобално ниво. Целта на овие пријави е да се пронајдат нови (евентуални) несакани ефекти, кои не се наведени во упатството за користење.

На следниот линк  може да се прочита за безбедноста на вакцините, за тоа дека и бремени жени може да ги примат по препорака на гинеколог, како и за нивниот состав.

Поради сите горенаведени факти, оценуваме дека не е точно оти вакцините предизвикуваат неплодност, дека сите вакцинирани ќе починат за неколку години. Овие тврдења се дадени паушално од немедицинско лице кое лажно е претставено како доктор.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар