Шведски лекар лажно тврди дека вакцината на „Фајзер“ содржи живи микроорганизми

Во видеото споделено во постот, шведскиот лекар д-р Енби, кому му била одземена медицинската лиценца во 2007 година,  прикажува фотографии на својот компјутер за кои тврди дека се микроскопски приказ на вакцината „Фајзер“,  а честичките што се движат на екранот, наводно, се живи микроорганизми. Составот на вакцината на „Фајзер“ е јавно достапен и може да се види дека вакцината не содржи живи организми, туку само хемиски компоненти кои го поттикнуваат човечкото тело да произведува антитела против ковид-19. Д-р Амеш Адаља, виш научник во Центарот за здравствена безбедност „Џон Хопкинс“, е категоричен  дека не е можно вакцините да содржат живи паразитски агенси 

Пост на Фејсбук шири дезинформации за составот на вакцината против ковид-19 на производителот „Фајзер“. Постот споделува видео од интервју со шведскиот лекар д-р Ерик Енби кој тврди дека во вакцината има живи организми, а неговите тврдења ги базира на наводно извршена микроскопска анализа на течноста од вакцината. Нашата проверка покажа дека ваквите наводи се лажни.

Шведскиот доктор Dr. Erik Enby, во фасцинантното интервју (видео), ја презентира неговата микроскопска анализа на vaxx Pfizer.

На седумнаесетминутното видео, објавено на Фејсбук, е прикажан шведски лекар кој тврди дека вакцината на „Фајзер“ содржи честички кои можат да ‘ртат и да предизвикаат болест кај оние кои се вакцинираат.

Станува збор за лекарот Ерик Енби, кому му била одземена медицинската лиценца во 2007 година, откако двајца пациенти заболени од рак за кои тој се грижел, починале по неговите рецепти за фунгициди, билки и витамини, покажуваат извештаите на шведските медиуми.

Во видеото споделено во постот, д-р Енби прикажува фотографии на својот компјутер за кои тврди дека се микроскопски приказ на вакцината „Фајзер“ против ковид-19. Честичките што се движат на екранот, посочува Енби, се живи микроорганизми.

Верувам дека тоа е поврзано со развојот на болеста. Мислам дека (честичките) можат да никнат во телото и ако никнат, ќе има понатамошен развој на растот и секакви неконтролирани нус производи, вели Енби.

Тој исто така тврди дека вакцинирана личност може да спречи ‘ртење на живите честички со земање витамини и додатоци.

Што содржи вакцината на Фајзер?

Составот на вакцините против ковид-19, кои се аплицираат во Македонија, е јавно достапен и тој може да се види на страницата ковид19вакцинација.мк. Составот на вакцината на „Фајзер“ е достапен и на нивната официјална веб-страница. Во составот на нивната вакцина има мРНА, липиди, полиетилен гликол, фосфохолин, холестерол, калиум хлорид, монобазен калиум фосфат, натриум хлорид, дибазит натриум фосфат дихидрат и сахароза. Никаде не е наведено дека вакцината содржи живи микроорганизми или честички.

Вакцината мРНА е транспортер на РНА генетски код. Тоа значи дека мРНА го користи само генетскиот код на вирусот. Вакцината мРНА се инјектира во телото и состојките влегуваат во клетките „упатувајќи им порака“ да почнат да прават антигени. Овие антигени се препознаени од имунолошкиот систем и со тоа ги подготвуваат клетките за борба против коронавирусот САРС-КоВ-2.

Нема докази за контаминација на вакцините

Волкер Маи, вонреден професор на Катедрата за епидемиологија на Универзитетот во Флорида, во изјава за Политфакт, вели дека не наишол на рецензирани докази за контаминација во вакцините на Фајзер.

Загадувањето со спори или друг микробен материјал теоретски може да се случи за време на производството на било што биолошко, вклучително и вакцините. Меѓутоа, контролата на квалитетот е обемна и мониторингот се случува континуирано. Така, многу е малку веројатно дека некоја контаминирана серија би се појавила на пазарот, рекол Маи за Политфакт.

Од компанијата „Фајзер“ за Ројтерс изјавиле дека нивната вакцина против ковид-19 не содржи никакви вирусни честички или живи компоненти. Станува збор за синтетичка mRNA вакцина чијшто состав е јавно достапен.

Не е можно вакцините да содржат живи паразитски агенси. Ова е произволно тврдење и ги игнорира чекорите за стерилитет што се на место, изјавил за Ројтерс Д-р Амеш Адаља, виш научник во Центарот за здравствена безбедност „Џон Хопкинс“.

Од сето ова можеме да заклучиме дека вакцината на „Фајзер“ не содржи живи организми, туку само хемиски компоненти кои го поттикнуваат човечкото тело да произведува антитела против ковид-19. Според тоа, постот кој го рецензираме, го оценуваме како неточен.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар