Шеесет граѓани утре ќе се вакцинираат против сезонски грип во Велес
![](https://duma.mk/wp-content/uploads/2023/10/vakcina.png)
По пристигнатата листа со шеесет термини за бесплатна вакцинација против сезонски грип во Центар за јавно здравје Велес утре се отвораат два пункта за вакцинирање. Во зградата на оваа јавна здравствена установа подготвен е пунктот за вакцинација. Просторијата се наоѓа на третиот кат во зградата, популарно наречена, „Хигиенски“. Испораката на вакцините се очекува во текот на денот, рече епидемиологот др Бојан Тодоровски.
„Дозите со вакцини ги очекуваме во текот на денот. Количините ќе бидат испорачувани на неделно ниво. Стигната е првата листа на заинтересирани и пријавени 60 граѓани. Во Центар за јавно здравје Велес подготвена е просторијата за вакцинирање во која има два пункта и од утре започнува процесот на имунизација. Во текот на денот се подготвува и алтернативна просторија за имунизација која ќе се користи во случај да дојдат пријавени граѓани кои се возрасни и не можат да се искачат на трити кат,“ додаде др Тодоровски.
Првите 60 граѓани заинтересирани за вакцинација против сезонски грип се пријавија на директно на страницата vakcinacija.mk со пополнување на формулар во системот Мој Термин или во нивно име тоа го сторија нивните матични лекари. Заинтересираните се уште можат да аплицираат.
Предност за добивање на термин за бесплатна вакцина имаат граѓаните кои припаѓаат на ризичните групи какошто се стари лица над 65 години, хронично болни, здравствени работници, бремени жени и деца на возраст од 6 месеци до 5 години. Државата набави вкупно 60 илјади вакцини против сезонски грип.
Постои и алтернативната можност за примање на вакцина против сезонски грип, којашто се плаќа по цена од 700 денари, но засега препораката на епидемиолозите е граѓаните прво да аплицираат за бесплатна вакцина.
Убавка Јаневска
![](https://duma.mk/wp-content/uploads/2021/05/SEMM.jpg)