Новите резултати од присуството на тешки метали во велешката почва ќе се објават по изборите
Колку штетни материи и остатоци од тешки метали има во велешката почва, денеска не обелодени државниот секретар на министерството за животна средина Соња Лепиткова. Таа потврди дека се направени нови испитувања, но не сакаше да ги каже резултатите од нив се додека не поминат престојните избори.
Лепиткова само потврди дека во почвата во Велес се уште има присуство на тешки метали од тридецениското работење на Топилницата. Акцијата за садење на рози била само една од мерките кои министерството за животна средина ќе ги преземе во наредниот период за прочистување на почвата.
– Оваа акција е само една од низата кои министерството ја спроведува со цел да се исчисти почвата од тешките метали, кои е факт дека ги има во неа, тоа не го криеме. Во наредниот период следуваат уште неколку проекти на министерството кои ќе ги спроведеме во Велес, токму на ова поле, рече Лепиткова.
Последните испитувања за присуството на тешки метали во велешката почва се направени пред три години. Тогаш резултатите покажаа дека во почвата има енормно повисоки количества на олово, цинк и кадмиум од максимално дозволеното./Д.С
![](https://duma.mk/wp-content/uploads/2021/05/SEMM.jpg)