Петнаесет заболени од туберкулоза регистрирани изминатата година во Велес
Најмладиот заразен има само десет години. Со оваа заразна болест се соочиле уште 14 граѓани од Велес и Повардарскиот регион. Од диспанзерот за белодробни заболувања велат дека бројката на заболени од туберкулоза опаѓа од година во година, но и покрај тоа е се уште присутна и не ја бира возраста.
– Во Велес лани имавме 15 заболени од туберкулоза, десет од нив се со белодробна а петмина со вонбелодробна туберкулоза. Значи имаме од најмало дете до најстар од 75 години. Десет од нив се мажи а пет се жени. Тоа значи дека болеста не поштедува никого и може да се појави кај секого, рече д-р Анета Ковачки специјалист пневмофтизиолог.
Освен со здрава исхрана и хигиена на високо ниво, граѓаните можат да се заштитат и со вакцинирање. Според лекарите тоа е најбезбедниот начин иако не е стопроцентен.
– Најспецифична заштита е вакцинирањето и тоа уште на почетокот на животот. Задолжително на овие пациенти им правиме и тест за ХИВ сида, за да можеме подобро да ги заштитиме, рече Ковачки.
Инаку лани во земјава биле регистрирани вкупно 323 заболени од туберкулоза, што е за триесет и двајца помалку од претходната година. Лекарите и институциите и понатаму ќе водат силна кампања да ја искоренат оваа болест од овие простори./Д.С
![](https://duma.mk/wp-content/uploads/2021/05/SEMM.jpg)