СДСМ праша каде се 7 илјади откорнати рози од Градскиот парк на што веднаш реагираше општина Велес
Без ниту еден одговор за тоа каде завршија 7-те илјади рози што екологистите ги засадија пред четири години, денеска локалната власт без никаков срам повикува на акција за садење рози во градот и бара поддршка од бизнис заедницата да помогне да се купат рози. Вака денеска реагираше опозицијата во градот за спорните рози.
Опозицијата прашува дали локалната власт исто вака ќе се грижи и за новите три и пол илјади рози што денеска се засадија низ градот.
– Дали за ова знае Владата на Република Македонија, бидејќи централната и локалната власт се во рацете на ВМРО ДПМНЕ. Ако Владата знаела за трагичната судбина на велешките 7 илјади рози од пред четири години, ако Владата знаела за постојаните реакции на екологистите и СДСМ за 7 – те илјади рози и нивното откорнување, тогаш која е моралната и етичка оправданост на Владата и на Општина Велес како поддржувач, кога не повеле грижа за претходно засадените рози. Постои ли воопшто минимална одговорност на власта во оваа земја ?“ рече Борче Павлов oд СДСМ.
СДСМ порачува, власта да не се крие позади јавното комунално претпријатие Дервен и јавно да ја признае грешката и да им се извинат на граѓаните за негрижата што ја покажале за заштита на животната средина.
Од Општината експресно реагираа соопштувајки дека СДСМ не може да го прифати фактот дека во Општина Велес се реализираат проекти кои се во насока на унапредување на животната средина, кои велешани ги прифаќаат со огромно задоволство а доказ за тоа била денешната акција „Македонија земја на розите – земја на цвеќето”.
„Но тоа на СДСМ не им одговара. Тие во своите мандати не направија ниту еден проект како за здрава и чиста животна средина така и за подигнување на еколошките стандарди. Да биде иронијата поголема немаат ниту доблест да ги поздрават оние проекти што Општина Велес ги спроведува. Ако беа навистина загрижени за животната средина во Велес немаше да ја бојкотираат денешната акција за засадување на рози која се спроведува на национално ниво, иако беа уредно поканети и известени. Нивната т.н грижа е само обично политикантство“, пишува во реакцијата на општината.
Го повторија ставот за одговорноста околу 7-те илјади розите што беа засадени и порачаа дека за тоа каде се розите, партнерите во проектот се најповикани да одговорат на ова прашање./Д.С
![](https://duma.mk/wp-content/uploads/2021/05/SEMM.jpg)