Акција на германската полиција: Македонски, бугарски и српски државјани шверцувале стотици килограми кокаин

Во Германија се уапсени неколку лица на возраст од 31 до 65 години, а меѓу нив има и македонски, бугарски, српски и ирачки државјани. Тие се лишени од слобода под сомнение дека дистрибуирале неколку стотици килограми кокаин.

Како што пренесуваат германските медиуми, со оваа акција, која била спроведена во средата, германската полиција успеала да ѝ зададе силен удар на меѓународната трговија со дрога.

-Осомничените учесници во синџирот на трговија со дрога беа уапсени во рации. Се наведува дека дистрибуирале неколку стотици килограми кокаин во областа Рајна-Мајна. Во акцијата за апсење, која беше спроведена во средата, учествуваа повеќе од 300 истражители, кои извршија претрес во сите станови што ги користеле осомничените, соопштија од обвинителството во Франкфурт и Федералната канцеларија за криминалистичка полиција (БКА) за медиумите.

Како што се објаснува, постои сомневање дека групата купила неколку стотици килограми кокаин во 2020 година од трговци на големо во северна Германија и регионот на Бенелукс и го дистрибуирала пред се во областа Рајна-Мајна и во соседните европски земји.

-Се сомнева дека групата имала мрежа на курири кои доставувале наркотици во користени автомобили кои имале специјално изградени бункери за шверц на наркотици. Парите од продажбата на наркотици ги чувале во неколку станови во областа Франкфурт, се вели во соопштението.

Според локалните медиуми, полицијата извршила рација во 30 станови во Хесен, Северна Рајна-Вестфалија и Баден-Виртемберг, како и во Хрватска и Полска, при што биле уапсени осум лица.

-Во Германија се уапсени шест лица под сомнение дека се членови на организирана криминална банда која се занимавала со продажба на наркотици во големи количини. Осомничените се на возраст од 31 до 65 години и се државјани на Хрватска, Србија, Бугарија, Северна Македонија, Црна Гора, Русија. При претресот се запленети бројни електронски помагала со со податоци и документација, се наведува во соопштението.

Дополнително, како што пишува порталот „hessenschau.de“, поради подетално испитување се запленети и неколку возила за кои се вели дека биле професионални скривалишта за криумчарење, а замрзнат е и имот вреден 1,6 милиони евра.

Истражувачите ја открија мрежата со анализа на комуникациите преку крипто провајдери. Се вели дека групата е формирана во 2020 година и продолжила да тргува со наркотици оваа година. Во средината на септември при царинска контрола на враќање од Белгија бил уапсен курир.

Дума.мк