СДСМ: Антикризните економски мерки од четвртиот пакет предвидуваат намалување на ДДВ за занаетчиските услуги
Објавено: 3 октомври, 2020, во 16:05 часот
3.10.2020
СДСМ денеска најави дека со четвртиот пакет на економските мерки се предвидува намалување на ДДВ од 18 на 5 отсто за занаетчиските услуги и производи.
Пратеничката на владејачката партија, Даниела Маркоска, на прес-конференција истакна дека сопоследните антикризни мерки е обезбедена помош и за занаетчиите.
-Со мерката наменета за занаетчиите се предвидува намалување на ДДВ на нивните услуги и производи од 18 на 5 отсто, со што ќе се зајакне нивната конкурентност на пазарот, потенцираше Маркоска и истовремено нагласи дека на занаетчиите и понатаму им остануваат на располагање и претходните економски мерки, односно помошта за исплата на платите или пристапот до поволните кредити од Развојната банка.
Намалувањето на ДДВ, како што рече таа, е само нова поволност која доаѓа како надополнување.
– Новиот пакет антикризни мерки со цел полесно справување со последиците од коронавирусот, предвидено е и намалување на стапката за ДДВ за ресторански услуги и служење на храна и пијалоци, со нова повластена стапка на ДДВ од 10 отсто наместо сегашната редовна, од 18 отсто. Оваа мерка ќе започне од 1 јануари 2021 година, преку неа ќе се постигне намалување на сивата економија, пониски цени за граѓаните, но и поголема ликвидност на услужниот сектор, изјави Маркоска.
