Две новозаразени лица и четири новопримени пациенти од Ковид 19 во Општа Болница Велес
Објавено: 21 август, 2020, во 13:53 часот
21.08.2020
На Инфективното одделение во велешка болница во изминатите 24 часа се примени четири нови пациенти заразени со коронавирус. Денеска на одделението се лекуваат вкупно 18 пациенти.
Според д-р Весна Николовска Неделкова од нив 14 се потврдени случаи на коронавирус додека четворица се сомнителни. На кислородна поддршка се пет пациенти.
-Тројца од новопримените пациенти се од Велес додека еден е од Неготино. Велешанка на 35 годишна возраст има потешка форма на пнеумонија со покомплициран наод на воспаление на бели дробови но е во стабилна состојба. Таа е примена завчера и е еден од вкупно петте пациенти кои во моментов се на кислородна поддршка, рече д-р Николовска Неделкова.
На одделението се лекуваат пациенти од Велес, Кавадарци, Неготино, Лозово и Свети Николе.
Денеска нема оздравени велешани.
Со новозаболените двајца велешани, од почетокот на епидемијата, во велешко вкупниот број изнесува 251 случаи и додека бројот на оздравени останува 208 пациенти. Од Ковид-19 починаа 14 пациенти. /У.Ј
