Малите велешани во посета на СВР Велес, учеа за работата на полицијата и безбедноста
Објавено: 20 ноември, 2025, во 11:00 часот
Најмалите велешани од детската градинка „Димче Мирчев“ беа во посета на Секторот за внатрешни работи Велес, каде Отсекот за превенција организираше интерактивна и забавна превентивно-едукативна активност.
Преку игра и непосредно дружење со полициските службеници, децата на разбирлив и интересен начин се запознаа со значењето на полициската професија, улогата на полицијата во заштита на граѓаните, како и со основните правила за безбедно однесување во сообраќајот.
Малите посетители имаа можност одблиску да видат дел од техничката опрема, униформите и службените возила што полицијата ги користи во своето секојдневно работење, што кај нив предизвика големо воодушевување и љубопитност.
-Целта на овие активности е приближување на полицијата до децата како најмлада категорија на граѓани и прифаќање на полициските службеници како пријатели кои се грижат за нивната безбедност, информираат од Министерство за внатрешни работи.
Како знак на успешната соработка, детската градинка „Димче Мирчев“ додели благодарница на Сектор за внатрешни работи Велес.
Во наредниот период се најавуваат и нови едукативни средби.
Стефани Манева
