Разбудете ги спомените: Нова технологија ги анимира вашите стари фотографии

03.03.2021

Интернет сајтот „MyHeritage“, кој се занимава со потеклото на човекот и генеалогијата, разви специјална алатка наречена „Deep Nostalgia“ која користи технологија на вештачка интелигенција за анимирање на стари фотографии.

Оваа технологија овозможува да „оживеете“ некоја личност од минатото, барем на екранот на вашиот компјутер.

Старите црно-бели фотографии со помош на оваа технологија сега ќе можете да ги видите во сосема друго светло. Софтверот ја поддржува можноста за анимрање на повеќе лица на една фотографија.

Кога ќе прикачите стара фотографија на платформата „MyHaritage“ и го активирате софтверот „Deep Nostalgia“, се создава анимација која се заснова на гестикулации и движења што претходно биле снимени на „жив“ модел и потоа биле вметнати во платформата.

Самите автори на оваа алатка велат дека нивниот изум може да ги подели луѓето на оние на кои екстремно ќе им се допадне и на оние кои ќе ја сметаат за целосно бизарна, пишува „Futurism“.

Како и да е, навистина е тешко да се остане рамнодушен на оваа можност. Сигурно на голем број луѓе низ светот ќе им биде мило да ја видат насмевката на нивниот прадедо или да видат некоја историска личност.

Како би изгледале вашите анимирани фотографии може да погледнете, откако истите ќе ги прикачете на следниов линк: https://www.myheritage.com/deep-nostalgia.

Мите Јаначков