Велешани денеска ја одбележуваат Митровденската задушница во знак на сеќавање на починатите

Со посета на вечните почивалишта на најблиските упокоени роднини, положување на цвеќе, молитва од свештениците за нивните упокоени души, палење на кандила, на свеќи како и принесување на мрсна храна и пијалоци на двете цркви во Велес, „Св.великомаченик Пантелејмон“ и „Свети Спас“ велешани го одбележаа православниот верски празник. Дел од граѓаните беа присутни и на новите гробишта во Раштани.

Црквата пропишала посебни денови – задушници, четирипати годишно, кога верниците се молат за покој на душите на починатите.

Задушница е секогаш в сабота, ден кој црквата го одредила за помен и молитва за упокоените. На Задушница се оди во црква каде што се служи литургија и парастос. На овој ден се посетуваат гробиштата каде што со молитва, пченица и лепче осветено со црвено вино се изразува помен за починатите.

На Задушница верните даваат милостина на сиромашните и се молат за покој на душите на упокоените. Митровденската задушница секогаш паѓа во саботата пред празникот Митровден.

Убавка Јаневска