Не е точно дека Турција има неутрален став за војната во Украина

Наспроти тврдењето на претседателот на Единствена Македонија, Јанко Бачев дека Турција има неутрален став во однос на војната во Украина, претседателот на Турција, Реџеп Таип Ердоган кажа дека неговата земја ја поддржува борбата на Украина за заштита на нејзиниот територијален интегритет. Министерството за надворешни работи на Турција, пак, соопшти дека инвазијата врз Украина претставува сериозно кршење на меѓународното право

Претседателот на партијата Единствена Македонија, Јанко Бачев во објава на Фејсбук се осврна на случувањата во Украина, коментирајќи каков став има Турција – како земја членка на НАТО:

Замислете, една регионална сила како Турција, членка на НАТО, промовира неутралност во војната во Украина.

За жал, марионетската власт во Скопје наместо принципиелна и неутрална политика во однос на Украина, одбра лигавење.

[Извор: Фејсбук профил на Јанко Бачев;Датум: 24.02.2022]

ОБРАЗЛОЖЕНИЕ:

Изјава на претседателот на Единствена Македонија, Јанко Бачев дека Турција има неутрален став во однос на војната во Украина, е неточна.

За тоа дека Турција не промовира неутралност во војната со Украина говори соопштението на Министерството за надворешни работи на Турција, што го пренесе турската агенција Анадолија, а во кое остро се реагира на воената интервенција на Русија и истовремено се повикува Москва „да стави крај на неправедната и незаконска акција’.

Сметаме дека воената операција започната од Вооружените сили на Руската Федерација против Украина е неприфатлива и ја отфрламе.

Интервенцијата, не само што ги уништува Договорите од Минск, туку претставува сериозно кршење на меѓународното право и претставува сериозна закана за безбедноста на нашиот регион и светот.

Нашата поддршка за политичкото единство, суверенитетот и територијалниот интегритет на Украина ќе продолжи, пишува во соопштението кое го објави турската агенција Анадолија

Соопштението, како што пишува агенцијата Анадолија, е испратено откако рускиот претседател Владимир Путин дал зелено светло за воена интервенција во Украина, само неколку дена по признавањето на двете енклави под контрола на сепаратистите во источна Украина.

Дел од медиумите објавија дека турскиот претседател, Реџеп Таип Ердоган, во телефонски разговор, еден ден пред да започне инвазијата врз Украина, му укажал на рускиот претседател Путин дека „нема да призане нити една мерка која влијае на интегритетот на Украина и дека воениот конфликт нема да му донесе на никому добро“.

И за време на претседавањето на состанокот на Советот за безбедност на Турција, на кој главна тема беше руската воена операција во Украина, турскиот претседател Ердоган истакна дека руската воена интервенција е тежок удар за мирот, благосостојбата и стабилноста во регионот.

Турција ја поддржува борбата на Украина за заштита на нејзиниот територијален интегритет, и тоа му го кажав и на Зеленски, со кого штотуку разговарав. Ја отфрламе воената операција што Русија ја започна во Украина и ја сметаме за неприфатлива,  нагласи Ердоган.

Имајќи ги предвид официјалното соопштение на Министерството за надворешни работи на Турција дека „руската интервенција е сериозно кршење на меѓунардното право“, како и ставот на турскиот претседател Реџеп Таип Ердоган,  дека „рускиот напад врз Украина е тежок удар за мирот, благосостојбата и стабилноста во регионот“,  изјавата на Бачев, дека „Турција како земја членка на НАТО има неутрален став во однос на војната во Украина“, ја оценуваме како невистинита.

ИЗВОРИ:

• Фејсбук профил на Јанко Бачев (24.02.2022) [Проверено на 28.02.2022]
• Агенција Анадолија ( 24.02.2022): Турција ја отфрла руската воена интервенција во Украина (aa.com.tr)  [Проверено на 28.02.2022]
• А1 ОН (23.02.2022): Ердоган до Путин: Турција нема да признае ниту една мерка која влијае на интегритетот на Украина (a1on.mk)  [Проверено на 28.02.2022]
• Фронт Лајн ( 23.02. 2022): Ердоган до Путин: Турција нема да признае ниту една мерка која влијае на интегритетот на Украина   [Проверено на 28.02.2022]
• Агенција Анадолија (24.02.2022):  Ердоган за рускиот напад врз Украина: „Тежок удар за мирот, благосостојбата и стабилноста во регионот“  [Проверено на 28.02.2022]

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар