„Макс и бесната дружина“ за најмладите кавадарчани во Дом на култура „Иван Мазов – Климе“

Последниот ден од јануари е за филм и пуканки. Германскиот детски филм „Макс и бесната дружина“ за најмладите кавадарчанчи ќе биде прикажан во Дом на култура „Иван Мазов – Климе“ во вторник, на 31 јануари, со почеток во 19:00 часот.

-Вашиот нов дом во вистински замок – можете ли да замислиш нешто покул? Деветгодишниот Макс може. Затоа што замокот Геролдсек е дом за стари лица полн со збрчкани баби и дедовци. Но, тој сега живее во замокот за мајка му, која е медицинска сестра и самохран родител, да може да работи ноќни смени. Тој е единствено дете меѓу сите овие стари… Но, Макс наскоро се спријателува со дел од постарите жители на домот: актерката Вера, фудбалскиот тренер Хорст и истражувачот Килијан, заедно попознати како Бесната дружина. Макс исто така забележува дека нешто чудно се случува во старите ѕидови на домот. Изгледа дека мистериозен крадец краде скапоцености од собите на жителите среде бел ден. Меѓу осомничените е и мајката на Макс, на која и се заканува отказ. Макс ги здружува силите со Вера, Хорст и Килијан за да го изведе вистинскиот крадец пред лицето на правдата, кратка содржина на филмот.

Сценариото на филмот е на Винфрид Елснер, Лиса Мари Дикрајтер, додека режијата на Винфрид Елснер. Во него играат Јона Ајзенблетер, Уши Глас, Мариа Хаалмер, Томас Тиме, Стела Брикнер, Алвара Хефелс, Нина Петри, Лео Ницка.

Секое дете и секој родител задолжително треба да има билет за влез во салата. Поради ограничениот број на седишта, влезници за филмот можат да се резервират на тел.број 075-347-370 исклучиво со СМС порака.

-Нагласете во пораката за кој ден и за која проекција. Доколку Ви е прифатена резервацијата ќе добиете повратен СМС. Влезниците по цена од 100 денари се подигаат на билетарница на Домот на културата најдоцна половина час пред почетокот на проекцијата. Доколку не бидат подигнати половина час пред проекцијата, ќе бидат пуштени во продажба, соопштија од Дом на култура „Иван Мазов – Климе“.

Остатокот од влезниците ќе во продажба на билетарницата два часа пред на почетокот на проекцијата.

Стефани Манева