Учесниците на состанокот во Давос не планираат каде ќе има војни, болести и глад

Не е вистина дека на состанокот во Давос се дискутира за тоа каде во иднина да се креираат војни, болести и глад. На состаноците на Светскиот економски форум се дискутира за предизвиците со кои се соочува светот, за веќе актуелни и постоечки проблеми од глобален карактер. Во врска со делот од постот каде учесниците во Давос се поистоветуваат со внуци на Луцифер, станува збор за пропагандна техника со којашто години наназад се оцрнува основачот на СЕФ Клаус Шваб, преку наративи за дискредитација и демонизација на настанот на кој се собира целиот цивилизиран и напреден свет

Рецензираме пост објавен на социјалната мрежа Фејсбук во кој се вели:

Се собраа во Давос внуците на Луцифер.

 Ќе дознаеме наскоро за каде низ светот, планираат да има војни, а каде болести и глад.

Во 1971 година, Светскиот економски форум за првпат одржа состанок во алпскиот град Давос каде се дискутираат предизвиците со кои се соочува светот. Учесниците на состаноците во Давос вклучуваат лидери од бизнисот, владите, цивилното општество, религиозни групи, медиуми, академици и артисти. Сите се собираат во конференциски сали за да учествуваат на состаноци чиј главен фокус се повеќе теми од климатски промени до криптовалути.

Кои теми се на агендата за 2023 година во Давос?

Темата на состанокот годинава е „Кооперација во фрагментиран свет, оптимистичен поглед во пресрет на растечката геополитичка тензија која се распространува од Украина до Кина“. Под оваа тема, во Давос ќе биде спроведена програма од околу 500 настани, со теми од глобалната рецесија до најновите достигнувања во зелената технологија.

Еден од примерите на состанокот е темата дека повеќе од една милијарда луѓе живеат со некаков вид на попреченост и тие се најтешко погодени од климатските кризи. Нивните потреби честопати не се вклучени во стратегии за дизајнирање инфраструктура и за кризни одговори на ситуации. Што пак, го отвора прашањето како може климатските промени да се претворат во можност за инклузија.

Понатаму се разговарало за глобалните здравствени нееднаквости кои се, за жал, реалност. Разликата меѓу животниот век на луѓето во развиените споредено со неразвиените земји е 14 години, додека маргинализираните популации внатре во државите се соочуваат со полоши здравствени прогнози. За да се адресираат овие здравствени нееднаквости СЕФ и партнерите почнуваат прва глобална, мултисекторска здравствена заложба којашто ја истакнува потребата за мултидисциплинарен пристап и акција на глобално ниво, за да се подобри здравствената еднаквост.

Во своето излагање Олена Зеленски, сопруга на украинскиот претседател Володимир Зеленски, се осврна на последиците од воената агресија од Русија врз Украина и можните консеквенци во поглед на инфлацијата, во поглед на луѓето кои морале да бегаат од земјата  итн. Во својот настап таа повика на поддршка за украинската страна.

Меѓутоа, во постот што го рецензираме, пак, пишува дека наводно на состанокот во Давос на СЕФ, се планираат војни во иднина, што не е точно. Во Давос, меѓу стотици други теми, се дискутира и за оние коишто се веќе актуелни и неизбежни во светски контекст, меѓу кои и воената агресија на Русија врз Украина.

Андреј Јермак од претседателската администрација на Украина ја истакнал трагедијата од загубени човечки животи поради војната и зошто не би било возможно да се постигне мир со Русија на традиционален начин.

Дел од темите кои се дискутирале е како да стане приоритет отпорноста на сајбер напади, како технологијата може да ѝ помогне на трговијата, 5 начини на кои бизнис лидерите може да направат импакт во нивните општества, се презентирало како економиите во зародиш инвестираат во нивната дигитална иднина, а се разговарало и за тоа дека загубата на природните ресурси претставува економска криза и дека се потребни иновативни решенија веднаш.

Лидери од Латинска Америка разговарале како може да се подобри глобалната енергетска транзиција и климатската агенда и како нивните држави решаваат внатрешни предизвици како инфлација, нееднаквости и одржливост.

Премиерот на Грција Киријакос Мицотакис во Давос зборуваше за енергетската криза и рускиот гас.

Имало и сесија на која се дискутирало за подобрување на правата на ЛГБТ заедницата, жените лидери, итн.

Сите овие, но и други теми се дел од сотанокот на Светскиот економски форум во Давос 2023.

Поради сите горенаведени факти оценуваме дека не е вистина дека на состанокот во Давос се дискутира каде  да има војни, болести и глад. Таму се дискутира за веќе актуелни и постоечки проблеми од глобален карактер. Во врска со делот од постот каде учесниците во Давос се поистоветуваат со внуци на Луцифер, станува збор за пропагандна техника со којашто години наназад се оцрнува основачот на СЕФ Клаус Шваб, преку наративи за дискредитација и демонизација на настанот на кој се собира целиот цивилизиран и напреден свет и се дискутираат теми од глобално значење за целата планета.

Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар