Армиските специјалци добија алпинистичка опрема
![](https://duma.mk/wp-content/uploads/2021/05/3.jpg)
Специјалните армиски сили добија целосно нова и совремана алпинистичка опрема. Таа се состои од витло за спасување, алпинистички јажиња за извлекување и за заштита при искачување, алпинистички појаси, алпинистички цокули и патики, шлемови, ламби за на шлемови, пластични и метални носилки за транспорт, бургии за бушење, канџи за вкопување во карпа и други потребни делови.
![](https://duma.mk/wp-content/uploads/2021/05/8.jpg)
Набавката на новата опрема се случува по 25 години и чини 15 милиони денари. Парите се обезбедени од буџетот на Министерството за одбрана.
![](https://duma.mk/wp-content/uploads/2021/05/5.jpg)
-Опремата ќе внесе голема промена како во поглед на вежбањето така и во поглед на користењето во услови на критични ситуации. Армијата ќе ја користи алпинистичка опрема како особено значајна за алпинистичките тимови за заштита и спасување на граѓани или припадници на Армијата во непристапен терен, рече министерката Радмила Шекеринска .
![](https://duma.mk/wp-content/uploads/2021/05/7.jpg)
Таа присуствуваше на промоцијата на новата опрема која ќе ја користат дел од припадниците на Баталјонот за специјални сили.
![](https://duma.mk/wp-content/uploads/2021/05/ARM.jpg)
Промоцијата се одржа на полигонот за воена алпинистика во близина на Демир Капија. На презентацијата беше изведена и воена вежба за спасување на планински и карпест врв. При прикажувањето на новата опрема беше вклучен и воен хеликоптер за воздушна евакуација и транспорт.
– Со ова речиси целосно го заокружуваме процесот на основно опремување на Армијата. Чекор по чекор покажавме дека кога тоа е приоритет, македонската армија може да биде и вистинска НАТО армија. Ги обезбедивме целосно сите припадници и со основна униформа и чизми, меѓутоа и во исто време обезбедуваме и спортска опрема за сите припадници, гортекс одела, основно вооружување, АБХ опрема, а од денеска и оваа алпинистичка опрема, рече министерката Шекеринска.
![](https://duma.mk/wp-content/uploads/2021/05/6.jpg)
На промоцијата на алпинистичката опрема присуствуваше и началникот на Генералштабот Васко Ѓурчиновски.
Убавка Јаневска
![](https://duma.mk/wp-content/uploads/2021/05/SEMM.jpg)