Интензивна берба на грозје во Демир Капија
Топлото лето услови побрзо зреење на винското грозје. Во Демир Капија лозарите интензивно работат на прибирање на родот за кој велат дека е квалитетен.
И годинава грозјето од демиркапијци го откупуваат винарски визби од Штип и од Гевгелија. За нив во откупните пунктови во Корешница, Неготино и во Росоман откупуваат Земјоделската аптека Агро Капија од Демир Капија и Земјоделската задруга Антигона од Корешница. Нивниот план е да откупат по околу два милиони килограми грозје од сите сорти.
Лозарите што ги наводнуваа плантажните лозја за време на тропските горештини се задоволни од родот и од квалитетот, а задоволни се и преработувачите на грозје. Според информациите од лозарите, откупувачите за висококвалитетните сорти плаќаат за десетина дена по откупот, а за останатите сорти малку подоцна.
Цената за висококвалитетните сорти се движи во просек по 16 денари за килограм, за кратошијата – вранец по 13, а за смедеревката по 11 денари за килограм.Лозарите годинава се позадоволни за разлика од минатите години, кога е во прашање откупната цена./А.Д