Росоманските овоштари денеска ги забележаа првите измрзнувања кај дрвцата со праски, кајсии и сливи
![](https://duma.mk/wp-content/uploads/2024/03/DSC00037-1024x576.jpg)
Во Росоман, температурата ноќеска и во раните утрински часови се симна под нула степени Целзиусови. Утрово се појави и мраз на насадите со праски, кајсии и сливи. Овоштарите денеска објавија дека на поголем дел од овоштарниците кои цутат ги забележале првите знаци за измрзнување.
-Потемне внатрешноста на цветот а тоа е првиот воочлив знак дека ќе падне од гранките наместо да врзе плод на праска, кајсија и слива. За ден до два ќе биде појасно колку од годинешниот цут ќе преживее а колку ќе се одвои од гранките и ќе падне на земјата, рекоа овоштарите.
За нив особено значајна е и оваа ноќ и утрешните рани часови на денот. Тие стрепат од помислата да не се повтори појавата на мразот.
![](https://duma.mk/wp-content/uploads/2024/03/DSC00101-1024x576.jpg)
Градоначалникот на Општина Росоман, Стојан Николов рече дека денеска од неколкумина овоштари бил информиран за појавата на ниска температура и мраз во нивните овоштарници.
-Очекувам дополнителни информации од овоштарите. Дел од нив во текот на денот ме информираа за временската непогода поточно дека температурата во текот на ноќта и во раните утрински часови се спушти под нула степени Целзиусови што остави први траги врз цветовите во нивните овоштарници. До сабота ќе се има поточна слика за тоа каква и колкава е штетата од временската непогода, рече Николов за Дума.мк.
Метеопрогнозерот Славчо Поповски пред неколку дена најави предупредување за земјоделците од појава на ниски температури и мраз во државата.
Убавка Јаневска
![](https://duma.mk/wp-content/uploads/2021/05/SEMM.jpg)