Сем се врати во Велес!

По една година, откако мораше да се врати во Џорџија, Сем Расел, повторно дојде во Македонија. Поранешниот член на Мировниот корпус не издржа повеќе од една година без своите пријатели во Кратово и во Велес.

Пред десеттина дена го спакува куферот, се качи во авионот и долета во земјата во чија култура се вљуби, меѓу луѓето кои го воодушевија со љубезноста, блискоста со семејствата, дружбата со пријателите и начинот на кои заеднички се социјализираат.

„Македонија е убава земја, ги сакам ридовите и планините што ги опкружуваат повеќето градови и езера посебно Охридското, луѓето што ги запознав и кој ми се пријатели. Тука се моите пријатели Мијалкови од семејството домаќин во Кратово каде престојував три месеци, Лујза и семејството во Велес во чија куќа живеев  скоро две години, Јадранка која ми беше колешка додека работев во општината и нејзиното семејство, соработниците од фондацијата Фокус и многу други пријатели во двата градови. Затоа сум повторно тука,“ рече Сем.

Раскажа како веднаш штом стигнал во Велес забележал дека поубаво е уреден Младинскиот парк, дека во него  завршува изградбата на црквата како и зградата на новиот театар додека за Кратово, по една година, раскажа како е истиот град со специфична убавина која зрачи од кулите и мостовите. Не сокри дека првично планирал со пријателите од Мировниот корпус да замине во Италија и оттаму на 15 мај да дојде во Македонија за тука да остане еден месец.

„Но плановите се сменија штом добив роденденска покана од мојата мајка, домаќин во Кратово. И еве сум тука, заедно со нејзиното семејство да го славиме роденденот. Ќе кажам дека многу ги сакам свадбите и веќе посетив една додека сум во Македонија, многу танцував до рано сабајле и сега ме боли ногата. Исто така играв ора бидејќи научив при мојот прв престој и ќе кажам дека ги покажував чекорите во Америка иако тие кај нас така лесно не можат да се одиграат, не се вклопуваат поради различната етно музика,“ рече смеејки се Сем.

Сем зборуваше како не му било лесно да се вклопи во средината во Америка, по минатогодишното враќање од Македонија, но и дека сега неговите пријатели во Џорџија знаат се за државата, луѓето и културата кои овде постојат. Посебно за љубезноста и сплотеноста на луѓето кои и сега му ги отворија вратите на домот, го поканија со нив да јаде чорба, да пие ракија и да разговара како и за тоа што сите реагираат на неговиот кус престој од само 14 дена во Македонија. Сем вети: „Ако не успеам наредната тогаш најдоцна во 2015 година повторно ќе дојдам и тогаш ќе останам еден месец, ќе ги посетам сите и ќе одам во Охрид.“

За него Македонија преставува голем предизвик поради различниот живот во Америка каде во големите градови живеат луѓе кои иако се соседи не се познаваат наспроти сплотеноста која ја поседуваат Македонците. „Она што таму го пренесов беше токму начинот на кој овде се живее. Многу Американци претходно не знаеја каде географски се наоѓа Македонија додека од религиозен аспект тие ја познаваат Македонија, од Библијата, каде се спомнува дека Свети Павле престојувал овде. Но, сега знаат многу повеќе за вашата земја бидејќи јас многу им раскажував,“ рече Сем.

Тој е особено горд што на своите американски пријатели им раскажал како лично учествуваше во подготовките и одбележувањето на 50 годишнината на Мировниот корпус во Македонија, што пред две години, се случи во Младинскиот парк во Велес. Потоа учеството при реконструирањето на детското игралиште и дека има свој придонес во проектот за заштита на културното наследство поддржан од француската национална асоцијација.

Се ова е документирано бидејќи Сем не се двои од својот фотографски апарат. Во него низ слики е собрана ,,Убавината на Македонија“.

„Она за што искрено жалам е што неуспеав добро да го научам македонскиот јазик за да можам да седнам на клупа во паркиот и да разговарам со постарите Македонци кои можат да ми раскажат за традицијата, за животот низ вековите и годините, личностите,“ рече Сем.

Но штом дојде в година вети дека ќе продолжи да го учи македонскиот јазик. Тоа ќе го стори затоа што сака со своите пријатели во Македонија да разговара на нивниот јазик./Б.Н