Основен суд Велес казни четворица „шетачи“ во градот за непочитување на полициски час
Објавено: 4 април, 2020, во 10:38 часот
Поради зголемениот интерес на јавноста Основниот суд Велес преку соопштение информира дека:
„На 30.03.2020 година донесени се пресуди за издавање на казнен налог К.бр.86/2020, К.бр.87/2020 и К.бр.88/2020, со кои пресуди огласени се за виновни четири лица за кривично дело „ Непостапување според здравствените прописи за време на епидемија од чл.206 ст.1 од Кривичниот законик“ и изречени им се парични казни од по 40 дневни глоби од по 20 Евра или по 800 евра за секој од сторителите.
Сторителите се огласени за виновни и казнети, поради непочитување на Одлуката за изменување на одлуката за забрана и посебен режим на движење на територијата на РСМ донесена од Владата на РСМ на седница одржана на ден 23.03.2020 година, објавена во Службен весник бр.74 од 23.03.2020 година, која одлука донесена заради спречување и сузбивање на опасната болест корона вирус COVID -19, според која Одлука се забранува движење на населението на територијата на РСМ во временскиот период од 21.00 часот до 05.00 часот наредниот ден,“ пишува во соопштението на Основен суд Велес објавено на официјалната веб страница на институцијата.
