(ВИДЕО) На нови 10 хектари од опожарена површина на езеро „Младост“ засадени уште 12 илјади садници
12.12.2020
Во акцијата учествуваат над 200 велешани кои новите садници со багрем ги засадија на локации, над веќе зафатените садници од минатогодишната масовна есенска акција за пошумување на езерскиот брег. На нова парцела, долу, во подножјето на ридот или покрај патот, 40 веќе израснати стебла на високо квалитетни дрвја засадија членови на „Лајонс клуб“.
Есенската масовна акција за пошумување траеше три часа. Во неа учествуваа граѓани, војници, пожарникари, акцијаши – ветерани, службеници, советници и раководни лица, претставници на граѓански здруженија, на Шумско стопанство ,,Бабуна“ и други почитувачи на природата и на здравата животна средина.
Претходно шумарските работници од „Бабуна“ ја подготвија почвата за садење. Тие ги изораа браздите со што го подготвија теренот за засадување на вкупно 12.000 нови садници.
Градоначалникот на Општина Велес, Аце Коцевски денешната масовна акција ја оцени за успешна.
,,Акцијата помина успешно и уште еднаш велешани покажаа и докажаа дека само заедно и сплотено може да се направи општо добро за заедницата. Ништо не е поважно од здравјето на луѓето кое се постигнува со благородна работа. И во иднина ќе продолжиме да работиме заедно на обновување и зачувување на животната средина“, рече Градоначалникот Коцевски.
По Ротаријанската шума, брегот на езеро „Младост“, од денеска има и Лајонс парк засаден со висококвалитетни израснати дрвја купени од нивниот клуб како и со садници што ги финансираше од собрани средства на концерт македонско-американската асоцијација ,,Алумни“.
Убавка Јаневска