(Видео и фото) Доброволна работна акција на Акцијаши Ветерани на Спомен Костурница, одбележан поранешниот ден на доброволна младинска работа
![](https://duma.mk/wp-content/uploads/2024/04/20240401_104414-1024x768.jpg)
Се беше исто како пред четири или пет децении. Тогашните бригадири на младинските работни бригади и денешни Акцијаши ветерани беа на работна акција. Доброволно започнаа со ново уредување на парковските површини под културниот споменик и симбол на Велес, Спомен Костурница.
![](https://duma.mk/wp-content/uploads/2024/04/20240401_094319-1-1024x768.jpg)
Сите заедно и на едно место, поранешни претседатели и секретари на Општинската организација на сојуз на социјалистичка младина на тогашен Титов Велес, членови на претседателства, секретарот на Сојуз на социјалистичка младина на Југославија и искусните бригадири како и команданти на велешките Младински работни бригади.
![](https://duma.mk/wp-content/uploads/2024/04/20240401_094418-1024x768.jpg)
Мотивација да се изведе еднодневната работна акција е да се одбележи 1 Април – денот којшто во поранешната држава, СФР Југославија, беше нивен ден. На младите момчиња и девојки кои добиваа само униформи, маички, патики и капи а работеа без финансиска надокнада на изградба на автопати, железнички пруги, патишта, водоводни линии, канализациони мрежи, насипи и кејови на реки или пошумуваа илјадници квадратни метри шуми. Тие на оваков начин и се оддолжуваа на државата и покажуваа младинска, граѓанска одговорност.
И денеска, кога најголем дел од поранешните Акцијаши се Ветерани, поточно пензионери или од пензија ги дели уште по некоја година спремно и одговорно ги фатија моторните и рачните пили, ножиците за кроење на гранки, копачите, мотиките, лопатите, ашовите и вилите за да го започнат уредувањето на парковската површина под и над Спомен Костурница. Освен што се радуваа на младите, ученици на државното училиште „Коле Неделковски“ и на волонтерите на велешки Црвен Крст тие ги повикаа своите сограѓани да им се придружат во намерата културно историскиот споменик повторно да го добие стариот сјај.
![](https://duma.mk/wp-content/uploads/2024/04/Akcijasi-Kolaz-1-1-1024x585.png)
Во денешната доброволна работна акција на ветераните од Работната бригада „Кочо Рацин“ учествуваа и вработените на Народен Музеј Велес.
![](https://duma.mk/wp-content/uploads/2024/04/20240401_104056-1024x768.jpg)
![](https://duma.mk/wp-content/uploads/2024/04/20240401_103314-1024x768.jpg)
![](https://duma.mk/wp-content/uploads/2024/04/20240401_102236-1024x768.jpg)
![](https://duma.mk/wp-content/uploads/2024/04/20240401_101201-1024x768.jpg)
![](https://duma.mk/wp-content/uploads/2024/04/20240401_102333-1024x768.jpg)
![](https://duma.mk/wp-content/uploads/2024/04/20240401_105016-1024x768.jpg)
![](https://duma.mk/wp-content/uploads/2024/04/20240401_104549-1024x768.jpg)
Ова е една од повеќето доброволни работни акции со кои ќе продолжи расчистувањето и уредувањето на зеленилото на Спомен Костурница што ќе се одржат годинава во Велес. Во нив може да се вклучат сите граѓани кои го почитуваат својот Велес и посакуваат да го видат по чист, по уреден, по зелен и полн со живот и особено со туристи дојдени да ги видат неговите спомен обележја.
Убавка Јаневска
![](https://duma.mk/wp-content/uploads/2021/05/SEMM.jpg)