Борачите се вратија во сала, легендата Ангел Мицев – Скакар годинава одбележува јубилеј

Во годината кога боречкиот клуб„ Борец“  бележи 60 години постоење, активностите се зголемуваат. Поминато годишните и на почетокот на годинава минимални активности заради пандемијата  сега веќе редовно се тренира и настапува на државните првенства и турнири. Најголеми се успесите во пионерска конкуренција на држаните првенства каде се освоени две први и неколку втори и трети места. Двајца борачи се земени во составот на државната репрезентација за пионери.

Овие постигнати резултати се причина за задоволството што не го крие тренерот на клубот Игор Мицевски.

-Пети сме во целокупниот пласман во сите конкуренции од 18 екипи во државата. Очекувам уште подобри резултати бидејки веќе тренираме редовно во салата „Гемиџии“. Финансиската состојба е подобрена. Благодарение на федерацијата добивме комплет нова опрема за тренинзи, реквизити и најнови душеци со церада,  по стандарди за одржување на настани од највисок ранг. Дека борењето се враќа во Велес  на голема врата говори податокот што во клубот тренираат и настапуваат и девојки, додаде Мицевски.

Во план е голем Меѓународен турнир во октомври, годинава, и со кои ќе се одбележи 60 годишниот јубилеј од постоењето на клубот.  Втор многу значаен момент  е шест деценискиот јубилеј што ќе го одбележи основоположникот на боречнкиот спорт во Велес, поточно Ангел Мицев –  Скакар . Тој годинава ќе одбележи 60 години активно борење и како и тренерска улога. Сега Ангел Мицев – Скакар е претседател на клубот БК „Борец“ Велес. Тој пред две седмици беше дел од Организациониот одбор на европското првенство за борачи до 23 години.

Лазар Лазаревски