Грци во Србија ќе одгледуваат алги за производство на струја !?

Грчката компанија “Algа enerdži”  има намера да инвестира 75 милиони евра за производство на енергија од алтернативни извори со горење на алги.

Алгите би ги одгледувале во Лесковац а околу 4000 работници би добиле работа,вели косопственикот на фирмата Јоанис Споридис-Антониадис.

Тој,по потпишувањето на меморандумот за разбирање со градоначалникот на Лесковац, Горан Цветановиќ им рекол на новинарите дека е заинтересиран за еден квадратен километар од земјиштето во Зелената зона.

Градот Лесковац, пред две години издвоил 100 ха земјоделско земјиште за Зелената зона. Планирано е на тоа подрачје да се изградат погони за производство на храна и дистрибутивен центар за овошје и зеленчук на југот на Србија.

“За две и пол години ќе инвестираме околу 75 милиони евра и постепено би вработиле околу 4000 луѓе. Почнуваме со еден хектар а на секој хектар ќе има по 50 луѓе. Нашата намера е да останеме повеќе од десетина години“,рече Споридис-Антониадис, додавајќи дека компанијата која тој ја претставува работи и во Централна Европа и Африка.

Градоначалникот на Лесковац, Цветановиќ рече дека грчката фирма е подготвена да почне со работа ова лето но, не е сигурен дали локалната самоуправа може да го исполни својот дел од обврските.

“Потребни се околу 100 милиони динари за пренамена на земјоделското земјиште во градежно а ние ги немаме тие пари“, рекол Цветановиќ.

Споридис Антониадис и неговиот грчки партнер за својата иноваторска идеја, производство на енергија од алги, во 2012 година добиле награда од Грчко-американската трговска комора во Атина во висина од 80.000 евра.

Извор: Beta