Коњаница, ора, песни и локална кујна – „Kаменот на плодноста“ ги обедини жителите на Општина Босилово (ФОТО)

Како во старите времиња, голем број граѓани од општина Босилово празникот посветен на Светите 40 Севасастиски маченици го одбележаа со посета на планината Огражден и каменот Бенли Таш,  кај народот познат како „Камен на плодноста“,објави Дрнка.мк.

Сакајќи да ја продолжи вековната традиција на месното население од овој регион,  КУД Кирил и Методи од Иловица веќе неколку години организира културно уметничка програма токму на локацијата каде се наоѓаат неколку метарските камења.

Според верувањето,  секој кој  ќе успее да помине низ тесниот отвор на камењата  ќе го следи здравје, среќа и бериќет. Во минатото кај народот постоело и верување дека каменот Бенли Таш има магична моќ и може да им помогне и на семејствата кои немаат пород па затоа бил наречен „Камен на плодноста“.

Според легендата,  секој оној кој на празникот посветен на Светите 40 Севастиски маченици ќе успее да помине низ тесниот отвор помеѓу двата камена ќе  му  помогне да ја оствари својата желба. Со текот на времето овие верувања биле напуштени,  останала да живее само легендата.

Сакајќи да се потсетат на старите обичаи, но и да ги промовираат природните убавини на нивниот регион, КУД Кирил и Методиј со поддршка општина Босилово секоја година на верскиот празник организираат посета на каменот каде реализираат богата културно уметничка програма со традиционални македонски песни и ора, и презентација на македонската кујна со специјалитети карактеристични за под огражденските села.

Годинава настанот доби поддршка и од коњаницата од Радово која ја придружуваше поворката на граѓани која од центарот на селото се упати да пешачи кон локацијата со големите камења.

Од друштвото велат дека на овој начин сакаат да ги запознаат младите со нашата традиција и обичаи, но во исто време да го поттикнат развојот на руралниот туризам.

Дума.мк