(Видео и фото) Велешани го наполнија амфитеатарот, свечено отворен XIX ИФФ „Велес “
Со дефиле низ централните градски улици кое што започна од Средношколски интернат „Лазар Лазаревски“ и заврши во Амфитеатар на Младински парк, вчера вечер, започна деветнаесеттиот Интернационален фолклорен фестивал „Велес“. Фолклористите во амфитеатарот ги пречекаа неколку стотици велешани кои исто така го проследија закачувањето на знамето на фестивалот, државната како и химната на Велес во изведба на гитара на Петар Марковски.
Бројни аплаузи од публиката добија за настапите и децата од велешката градинка „Димче Мирчев“.
Официјално, ИФФ „Велес 2024“, започна со обраќање на Томе Јаневски, претседател на организациониот одбор кој поздравувајќи го присуството на Зоран Љутков истакна дека фестивалот за прв пат е почестен со присуство на министер за култура.
Министерот за култура и туризам, Зоран Љутков ја имаше честа да го прогласи фестивалот за отворен. Љутков истакна дека е особено почестен што во родниот град му е дадена можност да отвори фолклорен фестивал којшто со сигурност израсна во репрезент на фолклорната традиција на народите од земјите учеснички на значајниот културен настан.
На првата од вкупно четирите фестивалски вечери на ИФФ„Велес 2024“ публиката ги проследи настапите и уживаше во изведбите на фолклористите на КУД „Коле Неделковски“ од Велес, Македонија, на ФА „Меорита“ од Романија, на КУД„Разиграна Македонка“ од Австралија, на „Кочаели фолклор СК“ од Турција, на КУД„Тодор Јанев“ од Чашка, Македонија, на ФС „Вах“ од Словачка, на ФС„Блажевски“ од Скопје, Македонија и на ФА „Јагитка“ од Украина.
Организациониот одбор на фолклорниот фестивал на Министерството за култура и туризам како и на сите учесници им врачи Благодарарници.
Гости на првата вечер на фестивалот ИФФ „Велес 2024“ беа и Проф. д-р Мирјана Мирчевска, претседателка на Сојуз на фолклорни ансамбли на Македонија како и м-р Благица Илиќ, професорка на ДМБУЦ “Илија Николовски Луј“ во Скопје.
Публиката, исто така, беше почестена и со солистички и хорски изведби на вокалните интерпретаторки на фолклорниот ансамбл „Јагитка“ од Украина. Нивната прва изведба „Слава на Украина“ беше посветена на актуелната состојба предизвикана од војната во Украина.
Вечерва со почеток во 20:30 часот во Амфитеатар на Младински парк ќе се одржи втората вечер на ИФФ„Велес 2024“.
Убавка Јаневска