Дума.мк во Игало, Црна Гора: Мимози, мажуретки, огномет и концерти на „Фестивалот на мимози“ (видео и фото)
Објавено: 13 февруари, 2026, во 23:49 часот
Мирисот на жолтиот цвет измешан со мирисот на Јадранско Море се ширеше низ Игало, кај Херцег Нови, вечерва, додека се уште пристигнуваа автобуси со гости на церемонијата на отворањето на 57-от Фестивал на мимозата, добро позната регионална манифестација, која заедно со фестивалот „Сунчане скале“ го прави овој дел на Бока которскиот залив, на Црногорското приморје, примамлив за љубителите на цвеќето, мажуретките, рибата, виното и добрата музика.
Над дваесеттина автобуси и бројни автомобили со македонски регистерски таблички паркирани се на паркинзите во градот.
Низ улиците на Игало, покрај обалата на Јадранско море, на плажите, во парковите, на плоштадите се подаруваат гранчиња или се продаваат илјадници букети на мимози. Цветниот пазар е преплавен од мимози во саксии.
Црногорските Денови на мимозата ги отвори актерката Тања Бошковиќ, почесен граѓанин на Херцег Нови.
-Исто како што Херцег Нови ги отвори сите свои врати, ве молам да ги отворите вашите срца. Среќен празник на Мимозата, порача актерката Тања Бошковиќ. Таа премиерно го изведе и „Новски валцер“ со текст и музика од Оливер Недовиќ, кој го потпиша и аранжманот со Алекс Котар.
Градоначалникот Стеван Катиќ му ги предаде клучевите од градот на карневалскиот шапкар Миќо Дамјановиќ.
– Фестивалот на мимозата е бренд на Херцег Нови и најважниот настан што се одржува во ова време од годината, кога го славиме најубавиот цвет, кој симболизира пријателство, братство, но кој исто така го симболизира почетокот на пролетта по долгата зима што нè мачеше сите. Ви благодариме што дојдовте во Херцег Нови, што го сакате нашиот град колку што го сакаме ние, рече Катиќ, поздравувајќи ја бројната публика собрана на платото пред поранешниот хотел Игало.
По свеченото отворање беше организиран 10 минутен спектакуларен огномет. Потоа следеа концертните настапи на Горан Каран и Нина Бадриќ.
Утре наутро, сабота, 14 февруари, ќе се одржи Фестивал на мимозата, рибата и виното по херцегованската ривиера. Калиопи ќе настапи на Фестивалот во Ѓеновиќ, а ансамблите „Стари Капетан“ и „Даниел Алибабиќ“ ќе настапат во Баошиќи.
Првиот бал за маскирање со мимози ќе се одржи во Институтот Игало од 20:30 часот, каде што гостите ќе ги забавуваат групите „Егзодуси“, „Тоќ“ и „Зана“.
До 28 февруари, годинава, во рамките на Празникот на Мимозата ќе бидат организирани повеќе од 60 програми.
Од Игало и Херцег Нови,
Репортерска екипа на Дума.мк
