Годинешните лауреати на „Рацинови средби“, Андоновски и Јазбец засадија садници во Рациновата шума

Добитниците на Рациновото и почесното Рациново признание за 2019 година, проф. д-р Венко Андоновски и Неговата Екселенција Милан Јазбец, амбасадор на Република Словенија во Република Северна Македонија, ја продолжија традицијата на засадување садници во шумата на Рацин. Тие на 6 јуни, на самиот почеток на годинешното издание на поетската манифестација, ги засадија своите садници.

Шумата на Рацин започна да се подига во 2014 година, на површина под Спомен костурницата на загинатите борци во Народно ослободителната војна. Од тогаш во неа садници засадуваат лауреатите, добитници на Рациновото признание и на Почесното рациново признание, и на тој начин оставаат траен белег.

Исто така учесниците и гостите присуствуваа и на чинот на положување свежо цвеќе и оддавање почит пред Рацин, на спомен костурницата од страна на делегации на општина Велес, јавни институции од градот, претставници на Советот на Општина Велес, на Друштвото на писатели на Македонија и други.

На проф.др Венко Андоновски и на Неговата Екселенција Милан Јазбец, Амбасадор на Република Словенија во државава, вечерва, на 7 јуни, ќе им бидат доделени признанијата на свеќеното затворање на 56 „Рацинови средби“ што ќе се одржи во велешки театар со почеток во 20 часот./У.Ј