Не е точно дека западните медиуми повикуваат на геноцид на сите Руси

Овој пост е со пропуштен контекст. Точно е дека Меланија Подолијак го напишала твитот, но подоцна тој е отстранет поради злоупотреба на правилата на Твитер. Наспроти изнесеното во постот, нејзините ставови на Твитер не се поврзани со нејзините гостувања во западните медиуми. Прво, тие гостувања биле неколку месеци пред објавениот твит и второ, гостувањата се однесуваат на нејзините ставови за тоа кои се потребите на Украина по руската инвазија и таму не се споменува никаков геноцид на сите Руси

Рецензираме пост објавен на социјалната мрежа Фејсбук во кој се вели дека западните медиуми повикуваат на геноцид на сите Руси. Во постот пишува дека украинската блогерка Меланија Подолијак, која била истакната гостинка на западните новински канали, побарала Русија и нејзиниот народ да бидат „избришани од лицето на земјата“.

Подолијак повика на геноцид во саботата, откако противвоздушната одбрана на нејзината земја, наводно, предизвикала руска ракета да погоди станбен блок.

„Апсолутно е фер да посакувам сите Руси и Русија да бидат избришани од лицето на Земјата“, напиша Подолијак на Твитер. „Тоа не е говор на омраза, не е ужасно од мене, тоа е само фер“.

Подолијак сподели слика од станбен блок во источниот украински град Днипро, за кој рече дека е уништен „по руски ракетен напад“…

Пред да повика на смрт на повеќе од 143 милиони луѓе, Подолијак беше пофалена на Запад. Поранешна функционерка на украинскиот парламент, таа беше претставена на NBC News како „политички активист“ кој бара Западот да испрати тешко оружје во Киев, а на Fox News како „медиумски консултант“ кој повикува на санкции против Москва. На својот канал на Јутјуб, таа на гледачите им нуди линкови за донирање пари на украинската армија, пишува во постот.

Во постот исто така се тврди дека украинскиот претседател Владимир Зеленски кажал дека „зградата била погодена од руски проектил, а неговиот советник Алексеј Арестович подоцна „признал“ дека проектилот бил соборен од украинско противвоздушно оружје, поради што ја погодил зградата.“

Не е точно дека западните медиуми повикуваат на геноцид на сите Руси. Твитот којшто се споменува во постот  е отстранет поради злоупотреба на правилата на Твитер заедницата и не е споделен на западните медиуми.

Точно е дека украинската активистка била гостинка на западни медиуми во минатото, но на сосема други теми и во нејзините гостувања таа не промовира идеја за геноцид. На пример, кога гостува на Ен Би Си Њуз, таа е претставена како украинска активистка, зборува за состојбата во тоа време во Украина, за хуманитарната помош која пристигнувала (пред 9 месеци кога е објавено видеото). Тогаш таа кажува дека на 23 март нејзин пријател бил убиен на боиштата кога ја бранел Украина, а дека другите нејзини блиски се добри, со оглед на тоа што и тие се приклучиле на одбраната после руската инвазија. Таа тогаш побара повеќе оружје за одбрана на Украина и вели дека единствениот начин на којшто може да се натераат Русите да си одат од нејзината земја е со повеќе оружје коешто ќе им биде донирано на украинските војници за да се борат за слободата на својата земја.

Кога Меланија Подолјак гостува на Фокс Њуз, пак, на 22 февруари 2022 година, таа зборува за довербата во војската на Украина, за тоа дека Западот треба да ги засили санкциите и економските одговори кон Русија, зборува за тоа дека во последните 8 години санкциите требало да бидат посилни од страна на ЕУ и Америка. Потоа таа зборува дека на Украина и е потребно САД и ЕУ да воведат санкции кон Русија, кажува дека Путин се грижи само за тоа што тој го сака и дипломатски договор не е возможен. Подолјак кажува дека Путин ги расипува медиумите, политиката, надворешните односи, дека целосната безбедносна архитектура на светот е загрозена од него. Таа се осврнува на тоа дека Путин веле оти Украина е дел од Русија, не е вистинска држава и, според неа, тоа го прави за да ја поткопа украинската сплотеност, како и сето она на коешто Украина работела последните 30 години. Во гостувањето на Фокс Њуз таа вели дека доколку нејзината локација биде нападната, ќе се приклучи во единица на армијата како медицинска сестра.

Евидентно е дека овие две гостувања на Украинката во западните медиуми Фокс Њуз и Ен Би Си Њуз, се однесуваат на периоди пред нејзиниот твит што се споменува во постот, а кој поради злоупотреба на правилата на Твитер заедницата е отстранет. Западните медиуми не повикуваат на геноцид на сите Руси како што невистинито се тврди во постот што го рецензираме. Гостинката во програмите на Ен Би Си и на Фокс Њуз зборувала пред да го напише твитот што е избришан и не е емитуван во овие програми. Поради сите горенаведени факти оценуваме дека постот е со пропуштен контекст. Точно е дека Меланија Подолијак го напишала твитот, но подоцна тој е избришан од Твитер. Наспроти изнесеното во постот, нејзините ставови на Твитер не се поврзани со нејзините гостувања во западните медиуми. Прво, тие гостувања биле неколку месеци пред објавениот твит и второ, гостувањата се однесуваат на нејзините ставови за тоа кои се потребите на Украина по руската инвазија и таму не се споменува никаков геноцид на сите Руси.

Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар