Др Николов: Сто бебиња помалку родени минатата во споредба со 2022 година, освен миграцијата постојат уште три клучни фактори за намалениот број на породувања во Велес

Додека Велес го очекува првото новороденче во 2024 година статистичките податоци на Oдделение за гинекологија и акушерство на ЈЗУ Општа болница Велес покажуваат дека во 2023 година родени се вкупно 294 бебиња. Од нив 138 се женски и 156 се машки. Споредено со 2022 година во велешка болница за прв пат заплакале помалку 100 новороденчиња. Началникот д-р Ѓорѓи Николов, специјалист гинеколог вели дека последните осум породувања во 2023 година се случиле во последната недела на последниот месец, заклучно со 30 декември и смета дека четири фактори придонеле за намалување на вкупниот број на раѓања на одделението.

-Главниот е миграцијата но, не не треба да се занемарат и споредните причини како што се помалку склопени бракови, потоа околу 80 породувања кои се извршени на скопска Клиника за гинекологија и акушерство или во останати приватни болници во главниот град и на територијата на државата. Младите мајки користат приватни осигурувања кои им овозможуваат породување во приватни болници. Се ова влијае на намалувањето на бројот на породувања во велешката болница. И не само во неа туку и во останатите јавни здравствени установи во внатрешноста на државата, додаде д-р Николов.

Инаку, помеѓу велешани се почесто се зборува за препораки од матични гинеколози за породување на бремени пациентки во приватни клиники. Приватното осигурување ја намалува цената на породувањето во приватните клиники во државата. Според искуства на неколку родилки коишто наместо во велешката се породиле во приватните клиники тие за нормално породување платиле помеѓу 1000 и 1200 евра додека за царски рез и по 2000 евра.   

Убавка Јаневска