Издумани Крлевизми: „Ама какви тајни вечери! Денешните Јуди делуваат уште на изгрејсонце“
Објавено: 16 јануари, 2026, во 15:52 часот
Петочните афоризми на сатиричарот и афористичар Атанас Крлевски се пред вас. Афористичкото перо мотивирано од секојдневните случувања на и околу обичните, мали луѓе изминатава седмица напиша 10 нови афоризми. Одвојте време да ги прочитате:
„Зад мене се крева златна прашина. Зад златен човек – златна прашина!“
„Глупоста и генијалноста ги дели многу тeнок, проѕирен ѕид. За среќа, непробоен!“
„Најбрзо се навикнуваме, а најбавно се одвикнуваме од лошите навики.“
„Дланката и тупаницата се доказ дека силата зависи од формата на масата.“
„Добриот трговец и на Кинез би му продал ориз.“
„Животот е цел на себе си..“
„Денешните мумии се живи.“
„Паметните понекогаш глумат будали, но никогаш во монодрами.“
„Ама какви тајни вечери! Денешните Јуди делуваат уште на изгрејсонце.“
„Се заљубив на прв поглед. За среќа се одљубив по првиот збор.“
Вашиот,
Атанас Крлевски
