Наместо во приватни лаборатории во Скопје граѓаните Д-димери можат да мерат и во Велес

Од 30 до 50 анализи Лу 1, дневно, паралелно се работат во лабораториите на двете јавни здравствени установи со кои се мерат Д-димери на нови ковид болни во Велес. Упатот на пациентите го издаваат матичните лекари во градот. Крв за потребите на овие пациенти се зема во термин помеѓу 11 и 13 часот. Резултатите се внесуваат во електронски систем во кој увид имаат матичните лекари и преку нив болните граѓани од Ковид-19. Резултатите се ставаат на располагање истиот ден во кој е  земена крв од граѓаните пациенти. Ова е бесплатна анализа за сите граѓани бидејќи е покриена со партиципација од Фондот за здравство.

Исто така, пост ковид пациентите, можат да измират Д-димери со лабораториска анализа Лу 2 во двете лаборатории, на Здравствениот дом и на Општа болница во Велес. Тие потребно е да дојдат рано наутро поточно во период од 7 до 9 часот. Резултатите ги добиваат во истиот ден. За ова лабораториска анализа потребен е упат од матичен лекар, од специјалист интернист или од специјалист инфектолог. Така анализата паѓа на товар на Фондот за здравство и граѓаните можат да ја направат со партиципација од само 150 денари. Доколку граѓаните се крводарители тогаш за нив е бесплатна. Единствено ако станува збор за граѓани кои не се осигурани тогаш тие ја плаќаат цената од 1.770 денари дефинирана од Фондот за здравствено осигурување.

Освен ковид и пост ковид пациенти, Д-димери, мерат и граѓани кои имаат потреба од вакви анализи за други заболувања.  

За разлика од цената што граѓаните ја плаќаат во приватните лаборатории во Скопје, и што изнесува од 1.200 до 2.000 денари, во двете јавни здравствени установи во Велес анализата чини 150 денари.

Убавка Јаневска