Нема центар за лекување од церебрална парализа алармираат здруженијата!

Случајот на 11 годишниот Стојанче Димовски од Велес кој боледува од церебрална парализа го отвори прашањето.

Зошто во земјава нема центар во кој би се вршело рано откривање и интензивни третмани и рехабилитација на луѓето кои се болни од церебрална парализа? Здруженијата кои се занимаваат со оваа проблематика велат дека илјадници семејства секојдневно се соочуваат со неможноста стручни лица да им помогнат на нивните деца. Од здружението на родители на деца болни од оваа болест велат дека државата мора да најде начин и да им помогне.

„Јас ова го зборувам бидејќи и јас бев родител на болно дете и знам коку е тешко да опстане едно семејство во кое има болен од церебрална парализа. Потребни се секојдневни третмани кои ќе му помогнат на болниот да функционира, а кај нас нема каде и кој да ги изведува. Значи мора и ние како граѓани, но и институциите да им помогнеме заедно на ваквите семејства бидејќи тие многу тешко опстојуваат во мачното секојдневие, а се со цел особено да им помогнеме на децата кои се болни од церебрална парализа“, рече Далиборка Златева,  Здружение на родители на деца болни од церебрална парализа.

Семејството Димовски лек за своето дете пронајде дури во Кина. Стојанче и неговата мајка на 1 ви декември заминуваат во странство на лекување оти тука не успеаја во намерата тој цврсто да застане на своите нозе.

„Овде докторите не велат ништо, само правиме секојдневни физикални вежби и масажи. Ова ни влеа надеж дека ќе успееме во нашата борба, јас се надевам многу а мислам дека Стојанче уште повеќе“, рече Македонка Димовска, мајка на Стојанче.

Броевите за донација за лекување на болниот Стојанче се сеуште отворени, а синоќа се одржа и хуманитарна акција во организација на здружението „46664“ и Лајанс клуб, Здруежнието на родители на деца болни од церебрална парализа и детската градинка „Димче Мирчев“. Но токму  за да не се потребни скапи лекувања надвор од земјава од здруженијата бараат итна помош за ваквите семејства./Б.Н.