Тутунарите со последна надеж дека ќе го спасат и продадат родот
Редици во Здружението на тутунопроизводители во Велес. Министерството за земјоделство во последен момент одлучи, да го откупи и последниот килограм тутун од производителите. Во здруженијата на тутунопроизводители во Велес, Градско и Чашка само за два дена се попишаа околу сто и осумдесет тони тутун од околу двеста производители.
Раскажаа како се надеваат дека ќе го предадат и последниот килограм, само да им се исплати маката. Во спротивно, ќе се скапе и ќе се фрли.
– Имав тон и осумстотини килограми тутун, еден тон ми откупија другиот ми остана. Се зборуваше сади ќе се откупува, сега што направија, ништо. Подобро да не работиме ништо и да чекаме социјална помош од државата, рече тутунопроизводител.
– Ако не го откупат ќе се расипе. Да пушиме, да го пушиме, ама ние не пушиме, да се јаде не се јаде, рече тутунопроизводител.
– Ене го така скапува по магацините, џабе ни е трудот и маката, рече тутунопроизводител.
Тутунопроизводителите се разочарани. Велат нивната мака никој не ја цени, па наместо да ги зголемуваат површините со тутун, ќе се откажуваат од производство.
– Наместо субвенции треба да ни ја дадат вистинската реална цена за тутунот, а они што прават, ни даваат субвенции кои не се ни пола од тие што треба да ги земеме ако сме во европска унија, рече тутунопроизводител.
Инаку во реонот на овие три општини, минатата година со тутун беа засадени 1050 хектари. Откупните компании откупија 1.650 тони квалитетен тутун. Сега тутунопроизводителите ги подготвуваат површините за новите насади тутун./Д.С